Kandidatu ofisiál supervizaun na'in-290 tuir ezame eskrita, iha salaun Jináziu Maliana. Imajen Tatoli/Sérgio da Cruz.

BOBONARO, 21 dezembru 2021 (TATOLI) – Komisaun Nasionál Eleisaun (CNE sigla portugés), Munisípiu Bobonaro, tersa ne’e fó teste eskrita ba kandidatu ofisiál na’in-290 hodi superviziona eleisaun prezidensiál tinan 2022.

Diretór CNE Munisípiu Bobonaro, Juvito Ramos, esplika, kandidatu hirak-ne’e bainhira pasa iha teste finál sei destaka hotu ba iha estasaun votu hamutuk 150 ne’ebé estabelese ona iha aldeia no suku sira iha munisípiu refere.

“Sira-ne’e pasa ona iha selesaun dukumentu kompostu hosi mane 161 no feto 129, ohin sira mai teste eskrita, kuandu pasa hakat ba teste intervista,” nia ko’alia  Jináziu Maliana.

Rekrutamentu ne’e bazea ba nesesidade ne’ebé CNE munisípiu Bobonaro presiza hamutuk ema na’in-150 hodi halo supervizaun ba entasaun votu sira kompostu hosi postu administrativu Bobonaro sei koloka ema na’in-44, Cailaco 16, Lolotoe 15, Maliana 36, Atabae 15 no Balibo 24.

Diretór ne’e fó-sai katak, matéria ne’ebé komisaun rekrutamentu sira prepara  liga liubá Konstituisaun RDTL, lei funsaun públika, lei eleitorál sira no istória Timor nian.

Iha fatin hanesan Fátima Caldeira ne’ebé konkore iha vaga ne’e prontu simu realidade bainhira rezultadu finál anunsia.

“Ha’u fiar-aan mak ha’u mai kompete, se lakon ne’e normál, maibé karik ha’u liu iha faze ida-ne’e, ha’u sei prepara-aan didi’ak hodi hasoru faze intervista, nune’e bainhira liu, ha’u bele konstribui ha’u-nia kapasidade tomak iha eleisaun tinan oin mai,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here