Estudante na'in-293 iha RAEOA tuir teste atu asesu ba UNTL-IPB. Imajen Tatoli/Abílio Elo Nini.

OÉ-CUSSE, 22 dezembru 2021 (TATOLI) – Estudante Ensinu Sekundáriu hamutuk na’in-293 iha Rejiaun Administrativa Espesiál Oé-Cusse Ambeno (RAEOA) tuir teste atu asesu ba Universidade Nasionál Timor-Leste (UNTL) no Institutu Politéknika Betano (IPB).

Xefe Gabinete Diresaun Jerál Ensinu Superiór, Ana Deolinda Viegas, informa, prosesu teste atu asesu ba UNTL no IPB ne’e realiza teste iha segunda 20 dezembru no termina iha iha kuarta, 22 dezembru.

Estudante hirak-ne’ebé teste iha loron segunda hahú ho siénsia téknolójia hamutuk na’in-188, prezente na’in-177 no auzente na’in-11.

Entretantu iha loron-tersa teste daruak ho siénsia sosiál umanidade hamutuk na’in-63, prezente na’in-57 no auzente na’in-neen. Nune’e teste loron ikus ba estudante ensinu téknika vokasionál hamutuk na’in-42, prezente na’in-40 no auzente na’in-rua.

“Estudante sira-ne’ebé rejista tuir teste atu asesu ba UNTL no IPB iha RAEOA hamutuk na’in-293, maibé na’in-19 mak la partisipa, rezultadu sei hein rejime jerál ne’ebé foin lalais hala’o ezame nasionál,” Ana Deolinda Viegas, informa ba Agência Tatoli, iha CAFE Plaban, Oé-Cusse, kuarta ne’e.

Nia fó sai katak, kritéria simu estudante foun ne’e ne’e fahe ba tipu tolu, dahuluk oportunidade ba estudante sira-ne’ebé akaba eskola hahú hosi 2017 to’o 2020.

Daruak ba veteranu nia-oan laiha limitasaun tinan remata ensinu sekundária, datoluk mak kbiit laek, ho mekanizmu hanesan ho tipu veteranu nia-oan.

Nia garante, prosesu simu estudante foun ne’e sei la’o ho susesu tanba prosesu tomak ezekuta tuir diploma ministeriál kona-ba asesu ensinu públiku previstu iha númeru 58/2021, 18 agostu.

Entretantu, tuir planu iha tinan akadémiku 2022 totál estudante univesitáriu ne’ebé sei asesu iha UNTL no IPB hamutuk rihun haat-resin.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here