Prezidente Autoridade Munisípiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO, 22 dezembru 2021 (TATOLI) – Autoridade munisipál Bobonaro lideradu Ernesto de Oliveira Barreto, husu Governu Sentrál prioritiza proposta-lei finansa munisipál nune’e kompleta implementasaun lei eleitorál munisipál, lei podér lokál no desentralizasaun administrativa.

Prezidente Autoridade Bobonaro, Ernesto de Oliveira Barreto, hateten, munisípiu preparadu implementa lei podér lokál, lei eleitorál munisipál no desentralizasaun administrativa maibé importante liu mak lei finansa munisipál.

Tuir nia, bainhira Governu Sentrál sentraliza serbisu hotu ba munisípiu, presiza liu mak lei finansa munisipál, tanba bazea ba entendimenu lei podér lokál fó kompeténsia ba autoridade munisípiu atu halo jestaun rasik intermu orsamentu no foti desizaun la depende ba nasionál.

“Tanba ne’e mak kuandu tama ona lei podér lokál ita tenke matenek buka osan rasik, liuhosi doadór sira iha rai-li’ur, maibé ita (Bobonaro) mós  iha taxa ne’ebé tama hosi fronteira Batugade aban bainrua bele fahe persentajen ho Governu Sentrál atu nune’e bele halo dezenvolvimentu boot iha ita-nia munisípiu rasik,” nia informa ba Agência TATOLI, iha kna’ar-fatin, kuarta ne’e.

Notísia relevante: Governu sei aprezenta proposta-lei finansa munisipál ba PN

Nia husu Ministériu Administrasaun Estatal (MAE) lideradu Miguel Pereira de Carvalho fó importánsia ba proposta-lei aprezenta ba reprezentante povu sira iha uma fukun aprova lei ne’e.

Durante ne’e preparasaun kondisaun mínima ne’ebé autoridade Bobonaro halo mak kompleta ona estrutura kargu xefia no diresaun sira hotu iha munisípiu hodi prepara implementa lei podér lokál no desentralizasaun administrativa.

Nune’e mós munisípiu Bobonaro fiar-aan atu tama iha podér lokál mak haree avaliasaun Programa Dezenvolvimentu Integradu Munisipál (PDIM) ne’ebé governasaun anteriór halo, Bobonaro okupa terseiru lugár hosi munisípiu sira seluk hodi sai nu’udar autoridade munisipál.

“Ha’u garante Bobonaro bele, tanba ita iha rekursu umanu bele dehan sufisiente, depois kargu xefia sira-ne’e mós ema-ne’ebé riku ho esperiénsia serbisu dezde  inísiu ukun-aan to’o mai agora sei nafatin, maibé ita presiza tán fó formasaun ba sira no rekruta tán balun atu responde ba polítika desentralizasaun,” nia katak.

Prezidente Autoridade ne’e subliña, maske Prezidente Repúblika promulga ona lei podér lokál no desentralizasaun administrativa, maibé lei ne’e mós la hateten munisípiu hotu-hotu iha obrigasaun tama iha podér lokál, tanba ekipa hosi nasionál sei halo avaliasaun imtermu kapasidade ezekusaun Orsamentu Jerál Estadu (OJE) kada tinan inklui rekursu umanu no rekursu naturál ne’ebé munisípiu sira iha.

Enkuantu rekursu naturál ne’ebé atu fó reseita ba munisípiu Bobonaro iha futuru mak hanesan gás iha suku Sibuni, postu administrativu Bobonaro, setór turizmu hanesan bee-manas Marobo no poténsia agrikultura hanesan natar no to’os.

Maibé nia dehan, setór importante hirak-ne’e barak mak autoridade munisípiu seidauk prioritiza atu dezenvolve tanba alokasaun orsamentu ba munisípiu kada tinan responde de’it ba nesesidade bázika komunidade nian, hanesan implementa PNDS no projetu PDIM kona-ba infraestrutura kiik sira.

“Agora ba oin ita presiza halo mak irrigasaun de’it, ida-ne’e ha’u hanoin ita bele riku hahan no fós bele distribui fali ba munisípiu sira seluk ne’ebé laiha natar, atu osan sira-ne’e povu bele uza ba moris kada loron,” nia dehan.

Notísia relevante: PN aprova projetu Lei Eleitorál Munisipál-Podér Lokál iha finál globál

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here