Prezépiu Natál, kosok-oan Jesus moris. Imajen/Espesiál.

COVALIMA, 22 dezembru 2021 (TATOLI)—Administradór postu administrativu Suai Vila, Luzinho do Rego, husu ba joven sira selebra loron boot natál tenke selebra ho domin no pás hodi labele hamosu konflitu.

“Loron besik daudaun ona sarani sira atu selebra loron boot Natál ne’e, bele lori dame no domin ba ita hotu no ba ita nia família. Ita hotu tenke selebra Natál ida-ne’e ho dame iha ida-idak nia família, bairru, aldeia, suku no postu administrative. Ba joven sira selebra loron boot Natál labele hamosu konflitu maibé tenke selebra Natál ho domin,” Luzinho do Rego informa ba Agência Tatoli, iha nia knar fatin, kuarta ne’e.

Entretantu, administradór Suai Vila ne’ebé foin asume kargu durante fulan haat (4) nia laran, tanba foin simu pose iha loron 03 fulan-detembru tinan ne’e, maibé hala’o ona servisu fíziku hodi halo reabilitasaun edifísiu ba postu administrativu Suai Vila, sintina públiku no alargamentu iha kampu Ladi.

Nia esplika, aleinde hala’o servisu fíziku administradór mós hala’o servisu non-fíziku hodi rekolla dadus família vulnerável sira atu hetan apoiu.

Dezafiu ne’ebé nia hasoru mak laiha fasilidade lojistíka, hanesan transporte no komputadór ba xefe sesaun no ba pesoál apoiu suku hodi suporta servisu administrasaun iha suku sira. 

“Durante iha nia mandatu administradór mós hasoru dezafiu mak seidauk iha apoiu fasilidade lojístika liu-liu transporte no komputadór ba xefe sesaun no pesoál apoiu suku hala’o servisu administrasaun iha suku,” nia dehan. 

Ho dezafiu hirak ne’e, administradór mós buka ona meiu bazea ba planu ne’ebé iha no Ministériu Administrasaun Estatál (MAE) belé prepara.

“Ita buka ona solusaun tanba durante ne’e komputadór ba suku sira bazea ba planu ne’ebè mak iha, Ministériu Administrasaun Estatál sei prepara. Ita hein bele to’o ona suku ida-idak,” nia hateten. 

Iha tinan 2021, postu administrativu hetan apoiu orsamentu $100,000 ne’e postu administrativu Suai Vila ezekuta hodi halo reabilitasaun jardin iha edifísiu postu administrativu Suai Vila $20,000 ne’e, osan $5,000 aloka ba programa mão de obra no $30,000 sosa mobiliáriu kadeira ho meza, falta ekipamentu informátika mak seidauk to’o. 

Bazea ba planu tinan 2022, administradór postu hakarak atinje atu responde nesesidade bàzika komunidade, liu-liu komunidade seidauk asesu sistema bee-moos bele estabelese sistema bee-moos ho adekuadu no estrada rural. 

Tanba, postu administrativu Suai Vila komunidade aldeia lima (5) mak sai área ruràl tebes la asesu eletrisidade no estrada, nune’e tinan oin liuhusi programa ne’ebè trasa hosi nível nasionàl bele responde komunidade nia preokupasaun.

Atu atinze planu hirak ne’e, planu prioridade ba orsamentu 2022, postu administrative Suai Vila sei halo konstrusaun postu saúde iha suku Suai Loro no konstrusaun estrada ruràl iha suku Beco ne’ebé hosi planu PDIM nian.

Kona-ba nia orsamentu projetu PIDM labele liu hosi $500,000, tanba ne’e hafoin ekipa tékniku elobara nia dezeñu mak foin hatene orsamentu. 

Jornalista : Celestina Teles

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here