INFORDEPE. Imajen/Espesiál

DILI, 21 dezembru 2021 (TATOLI)–Formadór timor-oan na’in-53 ne’ebé konklui ona formasaun lian portugés iha novembru 2021, preparadu atu apoia formasaun lian portugés ba profesór iha territóriu nasionál.

Prezidente Instituto Nacional de Formação de Docentes e profissionais da Educacão de Timor-Leste (INFORDEPE), Manuel Gomes, hateten, timor-oan selesionadu sei hamutuk ho profesór portugés na’in-33 hodi fó formasaun ba profesór 4.300 iha janeiru 2022.

“Formasaun ba profesór sira sei hahú hosi nível A2 B1 no B2, ne’ebé formasaun ne’e sei realiza iha munisípiu no postu hotu iha territóriu nasionál,” Prezidente INFORDEPE hateten ba Agência TATOLI, iha salaun Ian Martin, Balide, tersa ne’e.

Programa pro-portugés ne’e realiza tanba hetan akordu entre Governu Timor-Leste liuhosi Ministériu Edukasaun Juventude no Desportu (MEJD) no Governu Portugal, ho objetivu atu kapasita timor-oan hodi prepara-an atu sai formadór iha futuru.

Molok timor-oan na’in-53 selesionadu nu’udar formadór, antes ne’e iha timor-oan na’in-106 partisipa ona iha formasaun lian portugés, ne’ebé timor-oan seluk sai suplente bainhira formadu selesionadu dahuluk ne’e balun la konsege kontinua konfiansa nu’udar formadór no suplente balun maka sei substitui fali.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here