Arguidu eis padre Dasbach dala-lia ho polísia sira hafoin simu desizaun pena prizaun hosi Tribunál Distritál Oé-Cusse. Imajen Tatoli/Abílio Elo Nini.

OÉ-CUSSE, 21 dezembru 2021 (TATOLI) — Tribunál Distritál Oe-Cusse (TDO) tersa ne’e hamonu pena prizaun tinan 12 ba arguidu Eis Padre Richard Dasbach kona-ba krime abuzu seksuál hasoru labarik-feto na’in-haat iha orfanatu Topu Honis. 

Juiz Yudith Pamunkas, katak, arguidu provadu komete duni violasaun seksuál ba lezada na’in-haat no komete krime lima, nune’e tribunál aplika pena prizaun mínimu tinan-12 no másima-30.

Advogadu Miguel Faria ne’ebé fó asisténsia legál ba arguidu Eis Padre Richard Dasbach, sei koordena ho família no orfonatu sira, nune’e bele halo rekursu iha tempu tuir mai.

“Ohin, tribunál aplika pena kumulativu, tanba lezada na’in-haat sira-nia deklarasaun provadu arguidu komete abuzu seksuál, tán ne’e maka tribunál kondena arguidu ba tinan 12,” Faria informa.

Nia hatutan tan: “maibé ami la satisfaz, tanba haree ba testemuña direta hosi mama asrama, inklui antigu orfanatu sira-nia deklarasaun, tribunál la halo apresiasaun”.

Razaun seluk hosi rekursu, advogadu ne’e dehan vitíma sira-ne’ebé fó deklarasaun iha Oé-Cusse klaru, maibé ba Dili lae, maibé tribunál sempre a-favór ba deklarasaun ne’ebé fó-sai iha Dili.

“Ida-ne’e maka defeza ladún satisfaz, tán ne’e maka parte defeza prepara rekursu depois simu leitura akordaun,” nia katak.

Nia informa, daudaun ne’e tribunál aplika pena prizaun preventiva ba arguidu, tanba kondenadu nu’udar sidadaun Amerikanu no naturalizasaun hosi Indonézia. Atu evita perturbasaun, arguidu transporta kedas ba prizaun preventiva iha Dili, hodi hein rekursu.

Juiz Yudith Pamunkas ne’ebé halo leitura ba akordaun fó-sai katak, arguidu hetan pena tinan-ualu tanba provadu kontra lezada L3 ne’ebé previstu iha kódigu penál artigu 167 númeru 1 konjuga ho artigu 162 númeru 1 alínea A no D. Nune’e mós kódigu penál artigu 2 númeru 1 no 2 alínea B no artigu 35 alínea B kona-ba lei kontra violénsia doméstika.

Pena tinan-hitu ba prizaun tanba kontra lezada L4 ne’ebé previstu iha kógidu penál ártigu 167 númeru-2 konjuga ho 182 númeru 1 alínea A no D. Nune’e mós artigu 35 alínea B kona-ba lei kontra violénsia doméstika.

Pena tinan-hitu ba prizaun kontra lezada L5, previstu iha kógidu penál artigu 167 númeru 2 konjuga ho artigu 182 númeru 1 alínea-A no D. Nune’e mós  kódigu penál ártigu 2 númeru 1 no 2 alínea-B, no 35 alínea B lei kontra violénsia doméstika.

Pena tinan-hitu no tinan-neen (6) ba prizaun tanba komete krime rua kontra lezada L5, previstu iha kódigu penál artigu 167 númeru 1 no 2 konjuga ho artigu 182 númeru 1 alínea A no D. Nune’e mós alínea B hosi artigu 35 kona-ba lei kontra violénsia doméstika.

Entretantu, julgamentu ne’e prezide hosi Juiz Yudith Pamunkas, Ministériu Públiku reprezenta Prokuradór Mateus Nesse no arguidu hetan asisténsia legál hosi advogadu privadu Miguel Faria no João Ndun.

Tuir observasaun Agência TATOLI, nota katak hafoin rona desizaun iha tribunál katak eis padre ne’e tama kadeia tinan-12 halo labarik orfonatu sira tanis iha tribunál laran.

Hafoin sai mai li’ur, labarik sira kontinua tanis tuituir no balun tenta atu hakbesik ba eis padre ne’ebé simu ona peza efetivu tinan 12.

Jornalista         : Abílio Elo Nini

Editór               : Evaristo Soares Martins

PUBLISIDADEiklan