Autoridade RAEOA hatuur fatuk dahuluk reabilita estrada rurál iha Pante Makasar. Imajen/mídia ZEEMS.

OÉ-CUSSE, 21 dezembru 2021 (TATOLI) – Projetu reabilitasaun estrada rurál kilómetru 14 iha Rejiaun Administrativa Espesiál Oé-Cusse Ambeno (RAEOA), sub-rejiaun Pante Makasar, sei benefísia komunidade suku Bobokase no Costa.

Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hatuur fatuk dahuluk ba realitasaun estrada iha loron 18 dezembru liubá. Projetu reabilitasaun estrada rurál iha suku Bobokase liga ba aldeia Kutete, suku Costa, sub-rejiaun Pante Makasar.

Objetivu hosi lansamentu ba estrada rurál ne’e, atu fasilíta komunidade sira hosi suku Bobokase ba aldeia Kutete hodi asesu ba atividade ekonomia.

“Estrada ne’e sei benefísia direta ba komunidade sira iha suku Bobokase ba populasaun 768 ho uma-kain 315 no komunidade iha aldeia Kutete ho populasaun 618 hosi uma-kain 135. Estrada ne’e sei fó tulun sira bele halo viajen ba mai livre hosi dezastre naturál,” Arsénio Paixão Bano informa ba Agência Tatoli iha edifísiu ZEESM, Oé-Cusse, tersa ne’e.

Projetu ne’e ezekuta hosi empreza Lifau Indah Unipesoál Lda, hodi reabilita estrada rurál hosi suku Bobokase liga ba aldeia Kutete, suku Costa ho distánsia kilómetru 14, ho medida estrada metro-lima, ne’ebé kompleta ho rezolve valeta, ponte boot-ida no ponte kiik 10 no moru kontensaun.

Projetu reabilitasaun ne’e prevee ona iha Orsamentu Jerál Estadu (OJE) 2021 ho valór orsamentu $2,623,959.80.

Tanba iha tinan 2021 to’o 2022, RAEOA fó prioridade ba estrada rurál sira hosi suku 18 ba sub-rejiaun haat, hodi fasílita komunidade sira bele transporta sira-nia produtu lokál asesu iha merkadu, nune’e mós fasilita transporte privada no transporte públiku.

Arsénio Bano apela ba komunidade sira atu apoia programa autoridade hodi kontribui rai pedasuk ida ba alargamentu estrada.

“Oé-Cusse tenke ba oin, tán ne’e iha tinan ne’e ita hahú rezolve eletrisidade iha fatin izoladu sira, bee-moos iha fatin-fatin konserva bee-matan sira, gabiaun proteje natar no to’os rai maran, no daudaun ne’e rezolve estrada sira iha teritóriu Oé-Cusse,” nia katak.

Xefe suku Costa, Aleixo Abi, agradese ba autoridade RAEOA tanba iha tinan ne’e to’o tinan oin prioritiza estrada rurál sira atu tulun komunidade sira bele asesu ba merkadu ho di’ak, liuliu iha tempu bailoron naruk no tempu udan.

“Ha’u-nia suku iha destaka iha Oé-Cusse vila, maibé ha’u-nia área luan, komunidade barak hela iha foho hanesan, Lakufoan, Kutete. Fatin sira-ne’e izoladu dezde tempu uluk kedas,” nia akresenta.

Notisia relevante: RAEOA aloka millaun $4-resin ba projetu manutensaun-reabilitasaun estrada rurál

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here