Primeiru-Ministru, Taur Matan Ruak, ofisiálmente lansa futura instalasaun ba sidade universitária Aileu. Imajen Tatoli/Argentina Cardoso.

AILEU, 21 dezembru 2021 (TATOLI)—Primeiru-Ministru, Taur Matan Ruak, tersa ne’e. ofisiálmente lansa futura instalasaun ba sidade universitária iha suku Lausin, postu administrátivu Aileu Vila munisípiu Aileu.

Notísia Relevante: Fahi aten hatudu sinál di’ak, loke dalan realiza lansamentu sidade universitáriu

Iha lansamentu ne’e, Primeiru-Ministru akompañadu hosi Vise Premieru-Ministru, Armanda Berta dos Santos, no membru VIII Governu Konstitusionál ne’ebé simu direta hosi Administradór Munisípiu Aileu Abel da Conceição, grupu banda no lia-na’in sira.

Primeiru-Ministru, Taur Matan Ruak, hateten lansamentu ne’e hanesan obrá boot ida-ne’ebé akontese iha Timor-Leste, nune’e iha futuru bele hadi’a di’ak liután kualidade edukasaun nian iha Timor-Leste:

Primeiru-Ministru, Taur Matan Ruak. Imajen Tatoli/Argentina Cardoso.

“Finalmente, ohin, ita halo lansamentu ba futura instalasaun sidade universitária Aileu. se ita-boot sira haree iha istória Aileu, ita nia rai-husar, Aileu fatin ida-ne’ebe ita hahú revolusaun funu ba ukun an. Universidade hanesan UNTL sala balun laiha ona kondisaun atu simu ita-nia oan sira atu eskola no estuda iha Dili,” Primeiru-Ministru hateten iha ninia diskursu bainhira lansa futura instalasaun sidade universitária Aileu.

Tanba ne’e, Xefe Governu hato’o agradese ba família ne’ebé fó sira-nia rai no plantasaun ba Governu hodi harii sidade universitaria, no husu ba família sira-ne’ebé seidauk konkorda atu bele koopera ho Governu hodi halo dezenvolvimentu.

Primeiru-Ministru, Taur Matan Ruak, ofisiálmente lansa futura instalasaun ba sidade universitária Aileu. Imajen Tatoli/Argentina Cardoso.

“Inan-aman sira-nia sakrifisiu povu tomak no Timor tomak lahaluha. Ita-nia oan sira-ne’ebé aban banirua mai eskola iha ne’e, sira sei lahaluha. Ba inan-aman sira ne’ebé lakohi koopera, ha’u husu atu ajuda koopera ho Governu, tanba ba buat ne’ebé di’ak hodi bele dezenvolve nasaun ba oin,” Taur Matan Ruak hateten.

Administradór Munisípiu Aileu, Abel da Conceição, hato’o agradesimentu ba VIII Governu Konstitusionál tanba hili Aileu sai hanesan sidade universitária hodi fó oportunidade ba Aileu-oan sira, atu bele dezenvolve sira-nia an iha área edukasaun ba futuru ne’ebé di’ak liután.

Imajen Tatoli/Argentina Cardoso.

Rai ektare 24 ne’ebé populasaun sira oferese ba Governu ne’e sei sai fatin ba edifísiu universidade nian hodi sai hanesan sidade universitária ba futuru, tanba Aileu estrat’ejikamente lokaliza iha área sentru ne’ebé komunidade fasil atu asesu.  

Tuir planu, sidade universitaria ne’e sei hahú halo konstrusaun moru iha inisiu 2022, tuir programa ne’ebé Governu Timor-Leste trasa tiha ona.

Partisipa iha serimónia lansamentu ofisiál ne’e, Primeiru-Ministru no membru VIII Governu Konstitusionál, autoridade munisipál, líder komunitária, lia-na’in sira, estudante inklui komunidade iha Munisípiu Aileu.

Notísia Relevante: Sidade universitáriu Aileu, millaun $2.1 ba indemnizasaun ho reklamasaun

Jornalista : Argentina Cardoso

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here