Prezidente Repúblika, Francisco Guterres Lú Olo. Imajen António Gonçalves

DILI, 21 dezembru 2021 (TATOLI)—Prezidente Repúblika, Francisco Guterres Lú Olo, foti férias anuál hahú hosi loron 21 fulan-desembru tinan 2021 to’o loron 05 fulan janeiru tinan 2022.

“Hanesan mós titulár no membru órgaun soberania sira seluk, Prezidente Repúblika iha direitu ba foti férias loron tolu nulu (30) kada tinan ho direitu ba pagamentu remunerasaun tomak. Maibé, tinan-tinan Prezidente Repúblika Lú Olo la foti férias tuir lei mak determina tanba motivu servisu,” refere komunikadu imprensa ne’ebé Agência Tatoli asesu hosi Palásiu Prezidensiál Nicolau Lobato, tersa ne’e.

Ba tinan 2021, Prezidente Repúblika Lú Olo haruka ona karta ba Prezidente Parlamentu Nasional (PPN) katak foti férias hosi loron 21 dezembru to’o 5 de janeiru. Durante períodu ne’e Prezidente Repúblika sei la tama Palásiu hanesan baibain, maibé sei hala’o nafatin servisu sira tuir ninia kompeténsia nu’udar órgaun unipesoál (ema ida de’it).

Nu’udar órgaun unipesoal, Prezidente Repúblika labele delega ba ema ne’ebé de’it knaar importante ba vida Nasaun no Povu nian hanesan promulgasaun (ka veto) ba Lei no Dekretu-Lei sira.

Knaar importante tebes ida ba Prezidente Repúblika, hosi ohin ba oin, mak tetu Dekretu Númeru 55/V aprova hosi Parlamentu Nasional iha loron 18 dezembru 2021 kona-ba Orsamentu Jeral Estadu 2022. 

Dekretu ne’e tama horisehik iha Palásiu no Prezidente Repúblika sei haree ida-ne’e durante períodu férias, tanba diploma ida-ne’e importante tebes ba vida Nasaun no Povu nian.

Aleinde Lei Orsamentu Jeral Estadu (OJE), iha mós diploma legál lubuk ida-ne’ebé Prezidente Repúblika tenke foti desizaun durante períodu férias.

Tuir Estatutu Titulares Órgauns Soberania, (alínea a), númeru 4, artigu 10, Lei númeru 7/2007, 25 jullu, altera hosi Lei númeru 7/2017, 26 abril, tinan-tinan, titulár no membru órgaun soberania sira iha direitu ba períodu férias loron 30 no bele akumula ba beibeik bainhira labele hasai tempu férias tanba motivu servisu. 

Tuir lei haruka, sira sei la lakon direitu atu simu remunerasaun iha finál mandatu, karik la hasai períodu tomak férias tinan-tinan.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here