Jornalista sira bainhira halo kobertura iha ámbitu luta kontra COVID-19. Imajen TATOLI/Egas Cristóvão

DILI, 21 dezembru 2021 (TATOLI)—Reprezentante povu iha uma fukun Parlamentu Nasionál husu atu aselera prosesu pagamentu subsídiu ba jornalista liña frente ne’ebé presta ona servisu iha ambitu luta kontra COVID-19 iha Timor-Leste.

Notísia Relevante: Ministru Francisco: “Jornalista iha Direitu Hetan Subsídiu Liña Frente ho Baze Dekretu-Lei”

Deputadu PD, António da Conceção ‘Kalohan’, lamenta prosesu pagamentu ba jornalista sira to’o agora besik ona fulan dezembru atu ramata maibé seidauk hala’o, mezmu ekipa liña frente sira seluk hanesan pesoál saúde, membru PNTL no F-FDTL ho ekipa liña frente sira seluk hetan ona pagamentu.

“Loloos subsídiu ne’e kontempla ona ema hotu-hotu. Sira-ne’ebé liña frente iha direitu atu hetan tanba jornalista papél importante tebes ho responsabilidade bele habelar informasaun kona-ba númeru kazu ho prevensaun COVID-19 ba sidadaun sira,” Deputadu António Conceção hateten ba jornalista sira iha Parlamentu Nasionál, tersa ne’e.

Nia lamenta tebes tanba Governu nafatin la fó atensaun ba jornalista sira-ne’ebé servisu iha liña frente to’o ohin loron seidauk hetan pagamentu subsídiu.

Deputadu PD ne’e hateten, orsamentu ba liña frente previstu ona nune’e prosesu pagamentu mezmu tarde maibé pagamentu tenke la’o nafatin.

Entretantu, Prezidente Komisaun A, Joaquim dos Santos, mós husu atu aselera prosesu pagamentu subsídiu ba jornalista liña frente sira tanba presta ona servisu importante hodi divulga informasaun kona-ba COVID-19 ba públiku atu hatene.

Notísia Relevante: Governu aprova subsídiu ba jornalista liña frente

MAPKOMS prepara baze legál suplementu remuneratóriu ba jornalista liña frente

Jornalista : Nelson de Sousa

Editór        : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here