Sekretáriu Administrasaun Munisípiu Covalima, Francisco de Jesus Alves. Imajen Tatoli/Celestina Teles.

COVALIMA, 21 dezembru 2021 (TATOLI)—Sekretáriu Administrasaun Munisípiu Covalima, Francisco de Jesus Alves informa, munisípiu presiza tan lei rua mak lei finansa munisípál no lei patrimóniu Estadu atu implementa lei podèr lokál no desentralizasaun administrativa. 

Notísia Relevante: Lei poder lokál no desentralizasaun administrativa hanesan lei ne’ebé importante

“Ita hatene lei podèr lokál no desentralizasaun administrativa ne’e Prezidente Repúblika promulga ona, maibè presiza tan lei importante rua hanesan lei finansa munisípál no lei patrimóniu Estadu hodi kompleta tan lei rua ne’ebè mak iha ona atu implementa desentralizasaun iha munisípiu,” Francisco de Jesus Alves, hateten ba Agência Tatoli, iha nia servisu fatin, tersa ne’e. 

Razaun presiza tan lei rua ne’e tanba iha munisípiu sira seidauk iha lei finansa munisípál, nune’e ba futuru belé iha ona lei refere no orsamentu entrega ona ba munisípiu hodi belé implementa ona lei podér lokál. 

Provizóriu ita seidauk iha lei finansa munisípál maibé espera ba oin ne’e, ita bele iha ona lei ne’e. Agora orsamentu entrega mai ona iha munisípiu, ita belé implementa ona lei podér lokál maibé presiza tan lei rua ha’u temi ona, hodi regula orsamentu seidauk iha maibé kompeténsia téknika ita bele la’o ona,” nia dehan. 

Kompeténsia téknika bela hala’o mak hanesan orsamentu saláriu no vensimentu munisípál rasik mak jere, maske fonte orsamentu mai hosi OJE bainhira iha lei refere belé direta propoin orsamentu hosi munisípiu rasik.

Durante ne’e, munisípiu mós halo preparasaun kondisaun mínimu hodi kompleta estrutura kargu xefia no dirasaun sira halo preparasaun ba dezentralizasun administrativa.

Programa polítika desentralizasaun administrativa ne’e, hahú ko’alia kedas iha nivél altu iha primeiru Governu konstituisionál to’o ohin loron. Ko’alia kona-ba pre-dezkonsentrasaun agora tama ona dezkonsentrasaun maibè iha momentu ne’eba seidauk iha lei ida-ne’ebé atu ko’alia kona-ba podér lokál.

Tanba ne’e, foin lalais liuhosi Ministériu Administrasaun Estatál (MAE), aprezenta lei rua ba parlamentu Nasionál aprova ona no Prezidente Repúblika mós promulga ona iha loron 4 fulan Novembru tinan 2021.

Nia haktuir, durante ne’e iha munisípiu halo preparasaun kondisaun mínimu mak primeiru estabelese estrutura hanesan servisu munisípál, xefe departamentu no sesaun, administradór postu no halo rekrutamentu ba pesoál tékniku sivil, arsitektura no tékniku finansa, nune’e hodi prepara rekursu umanu atu responde ba polítika desentralizasaun. 

“Provizóriomente rekursu umanu ita preparadu maibè ita seidauk belé dehan kompletu. Tanba  bainhira iha podér lokál iha responsabilidade ne’ebé mak hosi nasionàl entrega tomak mai  iha munisípiu, ita presiza nafatin aumenta rekursu umanu presiza tan halo rekrutamentu ba funsionáriu no formasaun, nune’e prepara di’ak hodi responde polítika desentralizasaun,” nia esplika. 

Bazea ba entendementu hosi sekretáriu administradór munisípiu Covalima katak lei podér lokál mak fó kompeténsia ba munisípiu halo jestaun rasik ba munisípiu ida-idak ne’ebé nia iha orsamentu no foti desizaun rasik la dependénsia ba nasional. 

“Ita halo konsultasaun iha buat balun labele fó ba munisípiu mak hanesan moeda, seguransa no defeza, justisa sei kontrola hosi nasionàl maibé seluk hosi ne’e hosi ne’e ha’u hanoin mai hotu hosi munisípiu deside rasik,” nia haktuir.  

Munisípiu Covalima nia rekursu naturál durante ne’e depende ba setór sira hanesan mina, agrikultura mak natar no to’os hodi bele responde nesesidade povu Covalima. 

“Ita presiza mellora iha área agrikultura durante orsamentu ita hetan mai hosi fonte ida de’it 95% mai hosi fundu petróliferu, nune’e ita munisípál tenke iha kreatividade bele kontribui reseita noun petrolífera hanesan agrikultura, turizmu, bele kontribui reseita,” nia informa. 

Setór importante sira durante ne’e munisípiu seidauk hahú dezenvolve tanba orsamentu fó ba munisípiu ho limitadu sei konsentra liu ba nesesidade bázika ne’ebé komunidade sira presiza hanesan PNDS la’o hela projetu PDIM infra-estrutura kiik sei hala’o hela. 

“Nune’e munisípio Covalima kontribui reseita ba kofre Estadu mai hosi lisensa komérsiu, públisidade iha tinan haat (4) nia laran halibur $12.000 resin kona-ba fronteira ha’u hanoin alfandega mak halo jestaun,” nia hateten. 

Notísia Relevante: Komisaun A PN diskute projetu lei podér lokál iha espesialidade

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here