Vise Primeiru-Ministru no Ministru ba Planu no Ordenamentu, José Maria dos Reis. Imajen TATOLI/Egas Cristóvão

DILI, 21 dezembru 2021 (TATOLI)–Ministériu Planu no Ordenamentu (MPO), tersa ne’e, realiza semináriu konsultasaun públika kona-ba estudu diagnóstiku uzu solu ezistente iha sentru sidade Dili.

Vise Primeiru-Ministru no Ministru Planu no Ordenamentu, José Maria dos Reis, hateten, atividade ne’e realiza atu fahe opiniaun no informasaun balun kona-ba zonifikasaun sentru Dili no planeamentu urbana.

“Planu urbanizasaun hatudu hanoin ida ho vizaun pozitivu no dezenvolvidu ba ema hotu, ne’ebé ajuda atubele kompreende liután fatin no rekoñese dezafiu,” Ministru relata liuhosi diskursu iha ámbitu seremónia konsultasaun públika, iha salaun OKA, Hudi-laran, tersa ne’e.

Aleinde ne’e, iha mós kuadru legál, normativa no institusionál, ne’ebé ajuda atu aprezenta aspetu atividade operasionál sira hanesan saneamentu báziku, kestaun ambientál, jéneru no inkluzaun sosiál, ho objetivu atu iha armonia entre setór intervensaun sira hodi responde ba nesesidade sidade ba kresimentu ne’ebé lais.

Notísia relevante: MPO aprezenta estrutura prosesu reajustamentu PED ba Parlamentu Nasionál

Eventu ne’e foka liu ba sidade kapitál Dili, ne’ebé istorikamente riku tebes, hahú tinan 1.700-resin durante tempu kolonializasaun.

“Momentu ne’ebá kedas ita hotu hatene katak Dili hatudu potensialidade ho kondisaun ida di’ak, iha kosteira furak no hatudu buat balun ne’ebé maka harii hela durante kolonializmu portugés nian,” nia akresenta.

Durante períodu kolonializasaun enjeñeiru ida naran José Maria Marques elabora planu dahuluk ba sidade Dili, ne’ebé hosi momentu ne’ebá kedas Dili liuhosi faze barak no sofre mudansa oioin ho distriuisaun no rekonstrusaun balun, hosi tempu kolonializmu iha períodu invazaun to’o faze pós-restaurasaun independénsia inklui kresimentu populasaun ne’ebé lais tebes.

Nune’e, iha tinan-1960 ba kraik, iha populasaun 18.000 mak okupa Dili, to’o tempu Indonézia sa’e ba 80.000 no pós-restaurasaun independénsia no to’o mai agora kuaze iha populasaun 200.000-resin.

“Signifika durante tinan-20 nia laran, populasaun sa’e maka’as tebes iha Dili laran no previzaun katak to’o tinan-2030, bainhira situasaun ne’e la’o hanesan ne’e nafatin bele atinje to’o populasaun 500.000 iha Dili laran,” Ministru tenik.

Nune’e, densidade populasaun boot liu iha Timor-Leste sofre kresimentu  laiha planeamentu no ordenamentu di’ak ho infraestrutura la reziliente, ne’ebé rezulta problema no dezafiu barak hanesan sosiál, ambientál no ekonómiku, tanba ne’e Governu halo esforsu atu rezolve no garante katak kualidade moris di’ak populasaun.

Sidade kapitál Dili nu’udar kapitál administrativu nasaun, ho prezensa funsionamentu sentrál no poder polítiku no administrativu, ho populasaun besik 300.000, ho problema sira, tanba ne’e presiza iha mudansa no transformasaun, nune’e bele adapta ba buat sira ne’ebé akontese ona.

“Ita hotu hatene no konsiente katak iha aspetu ierarkia sidade Dili barak mak ignora no espasu konstrusaun sira ne’ebé relasiona ho patrimóniu arkitetóniku no urbanu Dili. Daudaun ita hasoru problema barak tebes hanesan falta saneamentu, abitasaun frajil, poluisaun no falta koezaun sosiál ne’ebé rezulta nível a’as probreza, dezigualdade, diskriminasaun no violénsia,” Ministru dehan.

Bele rezolve ho dezenvolvimentu planeadu no estruturadu

Governu bele hadi’a no rezolve problema sira bainhira konsege halo dezenvolvimentu planeadu no estruturadu ba sidade Dili, ne’ebé iha ligasaun entre poder polítiku, urbanístika no populasaun.

“Ita konsege kompreende liu no di’ak liután saida mak sosiedade ida presiza no ezije hodi ita bele organiza resposta no fó forma ne’ebé ho konsiente no realístiku. Prosesu ne’e tenki inkluzivu no edukativu, ne’ebé sidadaun sira sei sai parte iha prosesu tomak ho dever no direitu atu kontribui prosesu tomak, hanesan benefisiáriu ne’ebé konsiente ho nesesidade no manutensaun ba sidade urbana nu’udar sidade planeadu no sustentável.

Nune’e, MPO iha knaar relasiona ho prosesu planeamentu no ordenamentu territoriál, inklui planu urbanizasaun, nune’e projetu estudu sentru Dili tama hanesan programa regulár ida iha diresaun nasionál planu urbanu ninian, ne’ebé mak responsável ba estudu área urbana hodi identifika problema sira no trasa polítika ordenamentu di’ak.

Eventu ne’e partisipa hosi Prezidente Autoridade Dili, Xefe suku no estudante sira.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here