Tékniku EDTL, E.P halo hela instalasaun liña eletrisidade iha área Colmera, segunda (25/10). Imajen TATOLI/António Gonçalves

DILI, 21 dezembru 2021 (TATOLI)–Prezidente Konsellu Administrasaun Eletricidade de Timor-Leste, Empreza públika (EDTL, E.P), Paulo da Silva, hateten, eletrisidade ne’ebé kontinua mate iha kapitál Dili to’o haan tempu mak lakan fali, tanba impaktu hosi liña distribuisaun tuan.

“Ko’alia kona-ba liña distribuisaun, sasán sira-ne’e nia tinan tuan hotu,” Prezidente Konsellu Administrasaun EDTL, E.P hateten, iha Salaun Santo João Paulo, Comoro, tersa ne’e.

Aleinde ne’e, iha problema manutensaun, ne’ebé empreza estatál ne’e iha kontratu ho empreza hamutuk 12 ona atu halo manutensaun iha kapitál Dili, maibé to’o agora seidauk finaliza.

“Rede distribuisaun uza sistema manuál hela, entaun bainhira avaria, tékniku sira lori tempu naruk atu deteta, ezemplu fedeer I hahú hosi Camea liga to’o Liquiçá, ita la hatene fiu kotu no isolatór nakfera iha ai-riin ida ne’ebé, entaun tékniku presiza tempu atu deteta problema sira ne’e hodi rezolve,” nia akresenta.

Daudaun empreza estatál ne’e komunika ona empreza responsável ba projetu eletrifikasaun atu konklui lalais manutensaun liña distribuisaun.

EDTL, E.P nia esforsu ba tempu naruk mak atu hadi’a liña distribuisaun, nune’e iha loron 20 dezembru ne’e Governu Timor-Leste asina akordu empréstimu ho Banku Dezenvolvimentu Aziátiku (ADB, sigla inglés) ho montante milliaun $35, ba projetu modernizasaun liña distribuisaun.

Notísia relevante: MF-ADB selebra akordu empréstimu millaun $35 hadi’a distribuisaun enerjia eletrisidade

“Ida-ne’e sei ajuda ita halo investimentu liuhosi impréstimu, nune’e bele moderniza no dijitaliza liña distribuisaun, ne’ebé sei ajuda intervensaun rápida bainhira iha avaria ruma iha fatin balun, tanba ita sei estabelese sentru kontrolu iha kapitál Dili laran, nune’e feeder ka fiu ruma bainhira a’at iha ai-riin balun, tékniku sira bele rezolve lalais,” nia akresenta.

Jornalsita : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here