Xefe Suku Tapo-Memo, postu administrativu Maliana, munisípiu Bobonaro, Joaquim Baptista dos Santos. Imajen Tatoli/Sérgio da Cruz.

BOBONARO, 21 dezembru 2021 (TATOLI) – Komunidade aldeia Pipgalak II, ne’ebé lokaliza iha suku Tapo-Memo, postu administrativu Maliana, munisípiu Bobonaro maoria seidauk simu vasina.

Xefe Suku Tapo-Memo, Joaquim Baptista dos Santos, informa asuntu ne’e durante hala’o enkontru avaliasaun progresu no atinjimentu vasina kontra Covid-19 iha munisípiu Bobonaro  ho Asesora Asuntu Saúde Gabinete Primeiru Ministru, Danina Coelho no prezidente Ekipa Task-Forse munisípiu Bobonaro, Ernesto de Oliveira Barreto, iha salaun IADE, bairru Marabilha, suku Holsa, tersa ne’e.

Líder komunitária ne’e hateten, durante ne’e parte ekipa suku sempre halo liña koordenasaun di’ak la’o tama-sai uma  hodi fahe informasaun kredivel iha aldeia refere, maibé komunidade sira nafatin rejeita simu vasina.

“Ha’u-nia aldeia ida naran Pipgalak II ne’e maoria CPD-RDTL ho totál na’in-505, kala foin na’in-10 mak simu, restu lakohi simu hotu kedas, ha’u sempre hatún orden ba xefe aldeia, delegadu no delagada sira uza sistema otoriter lakohi halo servisu sai tiha, tanba ida-ne’e programa governu ba povu nia moris, maibé povu nafatin lakohi simu vasina,” Nia hateten.

Nia husu ba ekipa Task Force munisípiu Bobonaro atu halo intervensaun lalais, nune’e komunidade sira bele simu hotu vasina, tanba aldeia ne’e besik Atambua.

Relasiona ho prekupasaun ne’e, Prezidente Forsa Tarefa Prevensaun no Mitigasaun Covid-19, Munisípiu Bobonaro, Ernesto de Oliveira Barreto, husu populasaun sira iha aldeia refere atu kontribui partisipa iha programa vasinasaun, nune’e bele prevene-aan hosi surtu Covid-19.

Nune’e tempu badak  ekipa Task Force sei tún ba terrenu hodi halo sensibilizasaun kona-ba importánsia hosi vasinasaun.

Suku Tapo-Memo iha aldeia neen mak hanesan, Pipgalak I, Piogalak II, Lepgen, Kuluati, Tunubibi no Manu-Aman, ho totál komunidade  elizível simu vasina hamutuk 2.475.

Hosi númeru ne’e simu ona doze dahuluk 1.697, doze daruak 1.153 korresponde ho t69% no sei falta populasaun na’in-778 mak seidauk simu vasina.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here