Kandidatu ofisiál CNE na'in-178 hahú teste eskrita iha RAEOA. Imajen Tatoli/Abílio Elo Nini.

OÉ-CUSSE, 21 dezembru 2021 (TATOLI) – Kandidatu ofisiál Komisaun Nasionál Eleisaun (CNE, sigla portugés), Rejiaun Administrativa Espesiál Oé-Cusse Ambeno (RAEOA) na’in-178, tersa ne’e teste eskrita hodi hala’o supervizaun ba eleisaun prezidensiál 2022.

“Ohin, ita prepara halo teste ba kandidatu sira hanesan ofisiál supervizaun, sira na’in-178 tuir teste eskrita, nune’e prepara sira atu tau matan ba prosesu sira iha eleisaun prezidensiál ne’ebé sei akontese iha tinan oin,” Delegadu CNE RAEOA, Tomás Oqui Meta, informa ba Agência Tatoli, Oé-Cusse, tersa ne’e.

Nia fó sai katak, iha inisíu CNE anunsia vaga, ema na’in-226 mak submete sira-nia dokumentu, maibé liuhosi prosesu verifikasaun dokumentu konsege hetan kandidatu na’in-178 mak prenxe kritéria, nune’e ohin sira tuir teste eskrita depois sei kontinua ba teste orál hanesan prosesu finál.

Nia informa, vaga ne’ebé loke ba públiku, tuir planu hosi CNE RAEOA nian, sei presiza kandidatu ofisiál supervizaun hamutuk ema na’in-86 hodi ezersie sira-nia kna’ar nu’udar ofisiál supervizaun ba eleisaun prezidensiál, ho karatér transparánsia, neutralidade no independente.

Nune’e tuir kalendáriu ne’ebé CNE nasionál estabelese ona katak, ba kontratu atu hala’o kna’ar sei hahú iha loron 01 fevereiru 2022, ho tipu kontratu durante fulan-tolu.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here