Jogadór Karketu selebra nia susesu hafoin halakon Ponta Leste iha jogu LFTL. Imajen/LFTL.

DILI, 21 dezembru 2021 (TATOLI) – Ekipa istimadu kapitál Dili hanesan rai-na’in ba Dili susesu dala ida tan iha nia istória hodi sai knadidatu forte kampiaun Liga Futeból Timor-Leste (LFTL) 2021, maski seidauk termina jornada ikus primeiru divizaun.

Sekretáriu Jerál Karketu, Elizeu Isaac, hateten tarjetu hosi inisiu Karketu iha to’o ohin realiza duni mehi ne’ebé iha.

“Ida ne’e mak ami nia mehi, ida ne’e mak dehan Dili nia na’in mak Karketu, ema dehan fraku ne’e, fraku mak sira, Karketu mak Dili nian na’in tenke kampiaun iha Dili, ekipa seluk kampiaun iha Maliana no Baucau, maibé Karketu kampiaun iha Dili,” sekretariu ne’e dehan ho kontente.

Notísia Relevante: Karketu “mehi” sai kampiaun iha jogu primeira divizaun

Iha sorin seluk, Asistente Treinadór Ponta Leste, Van Basten relata, sente triste tanba bele lakon ho Karketu.

“Ami sente triste tanba lakon, maibé jogu ohin ne’e rame, Karketu manán la’ós tanba sira mak hatama golu, maibé golu ne’e auto golu no oportunidade mak laiha duni ba ami,” nia dehan.

Karketu iha direitu absoluta sai hanesan kampiaun tanba hosi jornada primeiru to’o jornada da-neen akumula ona pontu hamutuk 14, hodi so’e do’ok ona ekipa seluk, hanesan Lalenok United FC daudaun ne’e hetan de’it pontu 10, maski nia sei hela jogu ida kontra DIT FC bainhira manán nia sei hetan de’it pontu 13.

Nune’e mós SLB hetan de’it pontu hitu, Ponta Leste pontu ualu, Assalam lima, Aitana haat no ikus Liu DIT tolu, maski ekipa hirak ne’e joga remata pontu la to’o ho Karketu nian.

Karketu sai vensedór bainhira termina nia jogu ho Ponta Leste, iha tersa loraik ne’e,  iha Estádiu Munisipál Dili ho eskore 1-0.

Hanesan bainbain hahú jogu primeira parte iha estádiu nia tribun leten nakonu ho adeptu ekipa rua nian hodi fó suporta ba ekipa ida-idak, ho lian haklalak halo rame estádiu  ne’e.

Ho lian hirak ne’e fó oportunidade no motivasaun ba jogadór sira halo kontra no atake ba malu tuir tékniku no abilidade ida-idak nian.

Jogu foin la’o de’it minutu ida,  Karketu halo kontra atake ne’ebé másimu tebes ba ekipa Ponta Leste hodi buka hatama golu,  tanba jogadór Nataniel Reis (8) konsege domina bola iha liña oin Ponta Leste no  lansa sutu ida ho velosidade makas  ne’ebé kona liu jogadór Ponta Leste Americo Martis (5) bola tama liubá rede laran Ponta Leste  hodi muda eskore 1-0.

Hosi rezultadu ne’e halo Karketu kontente no hakas an makas liután, nune’e Ponta Leste mós tenta halo oinsa bele halo empate jogu ne’e,  maibé la konsege tanba Karketu sempre hamate tutuir Ponta Leste nia jogu.

Ho nune’e,  to’o minutu primeira parte termina laiha golu ruma mak akontese ba ekipa rua rezultadu mantein 1-0.

Dolar ba segunda,  parte ekipa rua nafatin halo kontra no atake másimu ba malu, maibé Ponta Leste nafatin lakon oportunidade barak tanba defeza Karketu Angiso Barbosa (6) tenta hamate tutuir sutu ne’ebé mak avansadu Ponta Leste,  Silveiro Garcia (27) no Anizio Correia (14) nian.

Ho fallansu iha kampu laran ba ekipa rua ne’e la konsege prodús tan golu ruma to’o minutu termina rezultadu mantein 1-0 ne’ebé vitória hela ba Karketu.

Jogu ne’e dirize hosi árbitru Pedro Maia, juiz liña Antonio Carvalho, Filomeno da Silva no árbitru rezerva Eufrasio da Costa.

Maski, Karketu kampiaun ona maibé seidauk bele simu premiu tanba jogu ikus kinta (23/12) Lalenok Vs DIT mak foin bele distribui prðemiu no Karketu selebra nia kampiaun iha kampu laran.

Notísia Relevante: Karketu ho Ponta Leste prontu kompete iha jogu primeira divizaun

Jornalista: Hortencio Sanchez

Editór     : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here