Enkarregadu Negósiu Embaixada EUA, Tom Daley, hamutuk ho Vise-Ministru Edukasaun, Juventude no Desportu, António Guterres, tesi fita bainhira inaugura edifísiu iha ESP 2 Baucau, tersa (21/12). Imajen Tatoli/Natalino Belo.

BAUCAU, 21 dezembru 2021 (TATOLI) – Enkarregadu Negósiu Embaixada Estadu Unida Amérika (EUA) iha Timor-Leste, Tom Daley, tersa ne’e entrega ona sala-haat ne’ebé konstrui hosi forsa navál Seabees ba Ensinu Sekundária Públiku (ESP) númeru 2 Baucau.

Tom Daley, hateten, forsa navál Seabees EUA ho apoia hosi Timór-oan na’in-neen no Australianu na’in-lima, konstrui sala-haat ne’e durante fulan-haat, hahú iha fulan-setembru to’o finaliza iha dezembru. Projetu ne’e ba dala-103 ne’ebé konstrui ka reabilita ona hosi Seabees dezde tinan 2009.

“Laiha indikasaun ne’ebé di’akliu kona-ba ami-nia kompromisu ba ami-nia amizade rohan laek no ba futuru Timor-Leste nian duké inaugurasaun eskola ida-ne’e,” Enkaregadu Negósiu Embaixada EUA hateten iha Vila Nova, tersa ne’e.

Forsa Navál Seabees oferese tempu tomak durante konstrusaun eskola refere no uza padraun seguru ne’ebé di’ak no exelente hodi harii futuru ida-ne’ebé di’ak liután ba jerasaun lideransa Timór-oan sira.

Estadu Unida Amérika nia Forsa Navál Seabees harii no reabilita ona klínika no eskola 100-resin iha territóriu nasionál hodi ajuda harii futuru ida di’akliu ba Timór-oan sira.

Seabees kompleta ona projetu sira valór liu millaun $50 durante tinan 10 dezde tinan 2009, halo rotasaun grupu enjeñeiru militár Amerikanu sira kada fulan-neen.

Nune’e mós iha tempu badak, Seabees sei hahú konstrusaun ba sala-aula rua ho hari’is-fatin iha Maubara, Liquiçá ho valór besik rihun $288.

Vise-Ministru Edukasaun, Juventude no Desportu, António Guterres, hateten, Governu Timor-Leste no EUA iha komitmentu kooperasaun iha área edukasaun ne’ebé envolve forsa navál Seabees ne’ebé konstrui ona eskola tolu iha Baucau.

“Ita apresia no agradese boot ba povu amerikanu nia apoia hotu, ha’u iha esperansa ida katak depois inaugura edifísiu ne’e ita iha responsáblidade atu jere ho kuidadu,” António hateten.

ESP Númeru 2 Baucau durante ne’e tenke fahe ba klase loron no lokraik tanba antes ne’e iha sala hamutuk 20 ne’ebé akumula estudante hamutuk na’in-1003, totál funsionáriu, profesór permanente no kontratadu hamutuk nai’n-73.

Totál orsamentu konstrusaun Eskola Sekundária Jerál 02 Vila Nova, Baucau ne’ebé konstrui hosi Forsa Navál Seabees ho montante rihun $350.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here