Kondisaun Eskola 05 de maiu ne’ebé hetan estragu tanba inundasaun ne’ebé akontese iha loron 13 marsu 2020. Imajen TATOLI/António Gonçalves

DILI, 21 dezembru 2021 (TATOLI)–Ministériu Edukasaun, Juventude no Desportu (MEJD) liuhosi Diresaun Nasionál Asaun Sosiál Eskolár (DNASE) fó ona apoiu emerjénsia ba eskola 36 iha munisípiu sia.

Diretór Nasionál Asaun Sosiál Eskolár, Joaquim Martins, hateten, hahú tinan 2020 to’o 2021 diresaun eskola munisipál sira submete proposta mai nasionál hodi halo prosesu verifikasaun, ne’ebé apoiu materiál sira kompostu hosi pregu, ai no kalen, no seluk tan.

“Ita apoiu de’it materiál emerjénsia ba eskola, maibé laiha mão de obra, sira mak organiza fali komunidade hodi hadi’a eskola,” Diretór Nasionál ne’e informa ba Agência TATOLI iha edifísiu MEJD, iha Villa-verde, tersa ne’e.

Notísia relevante: Eskola hitu hetan estragu maka’as no presiza hadi’a

Eskola 36 ne’ebé hetan ona apoiu emerjénsia, kompostu hosi edukasaun pre-eskolár tolu no eskola Ensinu Báziku Filiál (EBF) 33, hosi munisípiu Ainaro, Baucau, Bobonaro, Covalima, Dili, Ermera, Lautém, Manufahi no Viqueque.

Eskola sira hosi munisípiu Ainaro iha rua hanesan EBF Mane-tun no EBF Kai-seru, Baucau iha eskola ualu hanesan EBF Ada-boru, EBF Afasa, EBF Oso-Huna, EBF Bruma no EBF Dar-Nafa, EBF Bu-Koli, EBF Katólika Laisurulai no EBF Katólika Lelalai.

Munisípiu Bobonaro iha eskola rua mak hanesan EBF Ai-Asa no EBF Rai-Robo, munisípiu Covalima iha eskola lima maka hanesan EBF Suai Liga, EBF Kasíli, EBF Foho Bua, EBF Kadu-kama no EBF Tobun, munisípiu Lautém iha eskola tolu hanesan EBF Osú-basu, EBF Vaneria no EBF Ai-laku, iha munisípiu Ermera iha eskola hitu maka hanesan EBF Tuba-Remá, EBF Kategoa, EBF Tidin- Besi, EBF Tata, EBF Olbana, EBF Poe-leki no EBF Lebutu, Munisípiu Dili eskola rua EBF Moris foun Fatu-met, EBF Mota Ulun.

Munisípiu Manufahi iha eskola lima mak hanesan EBF Ai-tua, EBF Manus, Pre eskolár Sairema, Pre eskolár Surirema, Pres eskolár Uma Tutun Tutu Luro, no ikus liu munisípiu Viqueque iha eskola rua mak hanesan EBF Santo António Lakluta, EBF Uaibobo.

Aleinde ne’e, DNASE simu ona proposta foun hamutuk 17 hosi parte diresaun eskolár munisipál maibé tama inísiu tinan-2022 mak foin verifika.

Eskola sira hetan apoiu emerjénsia hosi MEJD  tanba antes ne’e afetadu dezastre naturál to’o halo eskola sira ne’e hetan estragu.

Jornalista : Tomé Amado

Editora     : Julia Chatarina         

PUBLISIDADEiklan

HAKEREK NO HATÁN

Please enter your comment!
Please enter your name here