EDTL, E.P realiza enkontru jerál ho kargu xefia sira hosi nasionál to’o munisipál, iha salaun Santo João Paulo, Comoro, tersa (21/12). Imajen TATOLI/Arminda Fonseca

DILI, 21 dezembru 2021 (TATOLI)–Eletricidade de Timor-Leste, Empreza Públika (EDTL, E.P), tersa ne’e, realiza enkontru jerál ho kargu xefia sira hosi nasionál to’o munisipál hodi halo avaliasaun serbisu durante tinan-ida.

“Objetivu enkontru ne’e hodi konsolida serbisu estrutura kargu xefia sira tantu nasionál no munisipál atu halo avaliasaun serbisu durante tinan-ida atu koordena malu halo konsolidasaun no prepara-an serbisu di’ak liután ba tinan oin,” Prezidente Konsellu Administrasaun EDTL, E.P, Paulo da Silva, hateten, iha salaun Santo João Paulo, Comoro.

Empreza estatál ne’e presiza halo konsolidasaun hodi hadi’a serbisu di’ak liután iha tinan-oin tanba tinan ne’e hanesan faze tranzisaun estabelesimentu hosi Diresaun Jerál sai empreza públika.

“Hafoin sai empreza públika iha tinan-ne’e, ita foku ba iha estabelesimentu kria regulamentu, forma estrutura kompleta, lei, prosedimentu, no giaun hodi implementa ita-nia serbisu sira, entaun enkontru ohin hanesan rohan ba tinan ne’e, ne’ebé koko atu haree saida mak bele halo di’ak liután iha tinan oin liuhosi esperiénsia sira ne’ebé ita halo iha tinan ne’e,” nia akresenta.

Notísia relevanteL MOP-EDTL.E,p hatuur ai-rin eletrisidade dahuluk iha Suku Tutuluro

Nune’e, EDTL, E.P ninia serbisu nu’udar serbisu tékniku, ne’ebé labele hein de’it orientasaun mak bele hala’o serbisu, maibé tenke iha kreatividade atu buka solusaun ba problema.

“Entaun liuhosi diskusaun ohin bele hamosu hanoin sira atu rezolve kestaun sira ne’ebé sai preokupasaun ba públiku ohin loron, tanba ita tau hanoin hamutuk, nune’e ba tinan-2022 ita bele implementa programa ne’ebé iha, liuliu atu atinje meta, tanba atu atinje meta ne’e presiza serbisu ekipa,” nia tenik.

Prezidente Repúblika, Francisco Guterres ‘Lú Olo’, promulga Dekretu-Lei kona-ba transformasaun estatutu EDTL hosi diresaun jerál ba empreza públika (EDTL, E.P) iha loron 20 jullu, maibé mudansa transformasaun ne’e sei akontese iha janeiru 2021.

Durante tranzisaun ba empreza públika, funsionáriu EDTL hosi diresaun hamutuk iha na’in-500.

Governu aprova ona estatutu EDTL sai hanesan empreza públika ho esperansa katak bainhira muda ona estatutu bele hamenus burokrasia no bele iha independénsia foti desizaun no halo atendimentu públiku ba avariasaun sira ho lalais no sustentável liútan.

Molok muda estatutu, EDTL hanesan diresaun jerál ida ne’ebé tutela ba MOP, nune’e atendimentu ba kliente tuir burokrasia iha ministériu sira, tanba ne’e bainhira muda ona ba empreza públika maka instituisaun ne’e iha ona autonomia fiananseira hodi halo atendimentu ho efetivu liután.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here