Edukasaun munisípiu Covalima realiza desportun eskolár ba estudante eskola sekundária sira iha Covalima liuhosi modalidade futebol, volibol no atletizmu. Imajen Tatoli/Celestina Teles.

COVALIMA, 21 dezembru 2021 (TATOLI)—Vise Prezidente Komisaun Organizadór Desportu Eskolár, João de Jesus Sita hateten, edukasaun munisípiu Covalima realiza desportu eskolár ba estudante sira atu bele hamenus konflitu no hakribit violénsia.  

“Ita realiza desportu eskolár ne’e, importante ba labarik sira atu ita bele inspira sira, lori estudante sira bele kuñese malu, kria unidade no amizade amizade hodi halakon no hamenus konflitu iha rai-laran, atu bele hakribit violénsia,” João de Jesus Sita informa ba Agência Tatoli, iha kampu futebol Ladi, suku Camanasa, Covalima, tersa ne’e.

Desportu eskolár ne’e realiza ho modalidade hanesan futebol ba mane, volibol ba feto no mane, altetizmu ka halai taru ba feto mane ho kilómetru hitu (7) no kilómetru lima (5). 

Desportu eskolár tinan ne’e partisipa hosi estudante sira hosi eskola sekundáriu públiku Suai, eskola téknika vokasionál Akar Laran, eskola téknika vokasionál Klaret Salele, eskola téknika vokasionál Nutetu Fohorem, eskola téknika vokasionál Zumalai, eskola sekundária Ave Maria Suai, eskola téknika vokasionál Kristál no eskola CAFE.

Desportu eskolár ne’e hahú iha loron 20 dezembru no sei finaliza iha loron 23 fulan dezembru tinan ne’e, ne’ebé manan-na’in sira sei hetan prémiu hosi komisaun organizadora. 

Kona-ba prémiu, komisaun organizadora deside lakohi fó sai tanba atividade desportu foin mak hahú loron rua (2) maibé sei iha prémiu ne’ebé sei atribui ba manan-na’in sira.

Edukasaun Munisípiu Covalima realiza atividade Desportu eskolár ne’e hetan apoiu orsamentu hosi Sekretáriu Estadu Juventude no Desportu (SEJD) hamutuk $2,500.

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here