Ministru Koordenadór ba Asuntu Ekonómiku (MKAE), Joaquim Amaral, lansa ofisiál Guia Esportadór Dijitál, iha salaun Otél Novo Turismo, Bidau Lesidere, segunda (20/12). Imajen TATOLI/Francisco Sony

DILI, 20 dezembru 2022 (TATOLI)-Ajénsia Investimentu no Esportasaun Governu Timor-Leste (TradeInvest, sigla inglés), segunda ne’e, lansa ‘Guia Esportadór Dijitál’ dahuluk, ho objetivu atu fasilita atividade komersiál iha Timor-Leste.

Diretór Promosaun Esportasaun, TradeInvest Decio Ribeiro Sarmento. Imajen TATOLI/Francisco Sony

“Guia Esportadór Dijitál sai hanesan matadalan hodi ajuda emprezáriu esportadór ne’ebé eziste hodi kontinua lori ita-nia produtu ba merkadu internasionál liuhosi website TradeInvest, nune’e bele kontribui ba kresimentu no dezenvolvimentu ekonomia ba tempu naruk,” Diretór Promosaun Esportdadór, Decio Rebeiro Sarmento, hateten, liuhosi nia diskursu, iha salaun Otél Novo Turismo, Bidau Lesidere, segunda ne’e.

Maski nune’e, website ne’e rasik iha faze dezenvolve no iha tempu badak mak sei loke ba utilizadór sira asesu.

Ho lansansamentu plataforma dijitál ne’e, TradeInvest fiar katak esportadór sira iha oportunidade no sei hetan benefísiu boot asesu ba atividade komérsiu internasionál.

Grupu Timor Furak hatudu dansa kulturál, iha salaun Otél Novo Turismo, Bidau Lesidere, segunda (20/12). Imajen TATOLI/Francisco Sony

“Nune’e, liuhosi Guia Dijitál ne’e bele fasilita produtu hanesan mina kamii no kafé ne’ebé halo esportasaun ba merkadu Hawai no Xina, ne’ebé sei kobre ba área sira hanesan agrikultura, peska, turizmu no manufatura nian,” nia akresenta.

Nune’e, atividade komérsiu internasionál ne’e sei fó biban empreza timor-oan sira hodi asesu ba mundu globál, ne’ebé infinidade inklui merkadu boot sira iha mundu hanesan iha rejiaun Aziátiku, Austrália, Nova Zelándia, Japaun, Xina, Amérika no nasaun seluk tan.

Guia Esportasaun Dijitál mosu tanba iha fulan-tolu liubá TradeInvest liuhosi Diresaun Promosaun Exportasaun ne’ebé hetan apoiu hosi Governu Austrália liuhosi programa Market Development Facility (MDF), konsege estabele grupu traballu tékniku ne’ebé kompostu hosi liña ministeriál, ajénsia públiku, setór privadu sira.

“Intesaun prinsipál hodi dezenvolve guia esportadór atu ajuda empreza sira bele komprende jere dalan ba esportasaun no fornese informasaun klaru kona-ba prosedimentu saida mak presiza kumpre durante halo atividade ne’e,” nia tenik.

Notísia relevante: Asosiasaun mundiál WAIPA prontu apoiu TradeInvest Timor-Leste

Nune’e, iha tinan-2022 TradeInvest sei konverta kontíudu hosi guia esportadór hanaran life on line trade portal exportacion, atu nune’e bele aliña mós mata-dalan estandar internasionál.

Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

Iha biban hanesan, Ministru Koordenadór Asuntu Ekonómiku (MKAE), Joaquin Amaral, ne’ebé lansa plataforma ne’e konsidera inisiativa ne’e hanesan marka tan istória ida atu fasilita esportasaun.

“Agradese ba parseiru sira, liuliu Governu Austrália liuhosi Market Development Facility ne’ebé ajuda ona dezeña plataforma online ba iha giaun esportadór sira,” Ministru Joaquin Amaral dehan.

Hanesan mós sekuénsia ida hosi guiaun seluk ba investimentu ne’ebé lansa ona iha tinan-2017, ne’ebé gradualmente hadi’a nu’udar parte ida hosi reforma administrasaun sistema atendimentu ba sistema dijitalizasaun.

“Ita komesa uza informasaun teknolojia atubele serví di’ak liután ba ita-nia kliente sira, liuliu fornese no simplifika informasaun ba esportadór sira atubele hatene mekanizmu halo esportasaun ba potensialidade produtu no merkadu sira ne’ebé hakarak esplora,” governante ne’e tenik.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here