Diretora PNDS Munisípiu Baucau, Amélia Maria Viegas. Imajen Tatoli/Natalino Belo.

BAUCAU, 20 dezembru 2021 (TATOLI) – Programa Nasionál Dezenvolvimentu Suku (PNDS) Munisípiu Baucau, realiza enkontru avaliasaun progresu serbisu durante tinan 2021 ho rekomendasaun balun atu konsidera iha 2022.

Diretora PNDS Baucau, Amélia Maria Viegas, hateten, avaliasaun anuál ba tinan ida-ne’e partisipa mós hosi parseiru, liña ministeriál, sosiedade sivíl no administradór postu administrative neen.

Funsionáriu PNDS, parseiru dezenvolvimentu, liña ministerial no sosiedade sivíl sira hala’o enkontru avaliasaun progresu servisu durante tinan 2021 iha CCB. Imajen Tatoli/Natalino Belo.

“Iha momentu ne’ebé susar, menus ekipamentu maibé ami nafatin esforsu-aan atu oinsá implementa projetu Uma Kbiit Laek (UKL) iha tinan 2021 ho kondisaun difisil maibé konsege implementa, maske hela suku Soba tanba kondisaun estrada,” Diretóra PNDS Baucau hateten iha Sentru Konvensaun Baucau (CCB, sigla Portugés), segunda ne’e.

Durante reuniaun avaliasaun ne’e, pontu rekomendasaun balun mak hanesan iha tinan oin bainhira UKL hahú presiza tau antensaun, liuliu alvu loloos ba kandidatu benefisiáriu sira, aumenta insentivu badaen, halais materiál konstrusaun ba fatin projetu no fasilita benefisiáriu sira iha akomodasaun hahan durante konstrusaun UKL.

“Ita rejista ona rekomendasaun sira ohin, ne’e sai hanesan dadus atu aprezenta iha nasionál,” Amélia hateten.

Munisípiu Baucau rasik durante implementasaun konsidera tarde tanba kondisaun estrada, klima inklui fornesedór materiál konstrusaun hanesan kalen ne’ebé tarde ba fatin projetu.

PNDS rasik atinje 52% tanba finaliza ona Uma Kbiit Laek hamutuk 59, enkuantu uma 115 sei iha faze finalizasaun no uma tolu iha Suku Soba seidauk halo konstrusaun hosi totál benefísiariu 177 ba suku 59 iha Baucau ho totál orsamentu $ 3.192.372.

Xefe Departamentu Monitorizasaun no Evaluasaun PNDS Nasionál, Bartolomeu Dias Tilman, hateten, jeralmente PNDS enfrenta problema, kondisaun estrada difikulta mobilizasaun materiál konstrusaun ba fatin projetu.

“Agora daudaun nível nasionál ita atinje 80%, espera katak tinan-ne’e bele atinje 100%,” Bartolomeu akresenta.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here