PA RAEOA, Arsénio Paixão Bano, abertura Kopa Mekosikaloti ba klubu-20 iha Naimeco. Imajen Tatoli/Abílio Elo Nini.

OÉ-CUSSE, 20 dezembru 2021 (TATOLI) – Prezidente Autoridade Rejiaun Administrativa Espesiál Oé-Cusse (RAEOA) Arsénio Paixão Bano, domingu ne’e ofisialmente abertura Kopa Mekosikaloti ba klubu-20 hodi kompete iha modalidade futeból iha suku Naimeco, sub-rejiaun Pante Makasar.

Iha serimónia abertura ne’e, Prezidente Autoridade RAEOA, Arsénio Paixão Bano, agradese ba autoridade lokál, intelektuál no komunidade suku Naimeco, tanba ho inisiativa loke Kopa ba joven sira hosi promove talentu desportiva iha baze, nu’udar preparasaun fini ba futuru hodi kompete iha nívwl rejionál no nasionál ho kualidade.

“Autoridade hakarak fó parabéns ba suku ne’e tomak tanba ho unidade hakarak kria jogu ida-ne’e hodi dudu joven sira hatudu sira-nia talentu, hahú hosi baze, ha’u orgullu. Ho hanoin ida- ne’e ita bele prepara oan sira ba kompetisaun iha futuru, bele partisipa iha rejiaun,, bele mós reprezenta Oé-Cusse ba nasionál,” nia ko’alia iha ámbitu serimónia abertura iha kampu futeból Baqui, suku Naimeco Oé-Cusse.

Autoridade ne’e fó sai katak, iha loron 09 dezembru semana kotuk, partisipa hodi observa iha jogu Kopa Navál iha nasionál, FC Naimeco sai kampiaonatu iha nivél nasionál hafoin halakon klubu ida hosi Venilale Baucau, nune’e hanesan autoridade orgullu, tanba reprezenta RAEOA, reprezenta suku Naimeco hamorin Oé-Cusse nia naran iha nasionál.

“FC Naimeco loke dalan ona ba RAEOA, atu sempre iha nasionál hatudu-aan katak, Oé-Cusse mós bele, tán ne’e liuhosi Kopa Mekosikaloti bele hasa’e tán kualidade desportu ba futuru bele partisipa iha liga no jogu nasionál sira seluk,” nia argumenta.

Prezidente Komisaun Organizadora Kopa Mekosikaloti, Vincencio Nono, aprezenta objetivu prinsipál hosi jogu Kopa Mekosikaloti, atu dignifika no prezerva istória klubu antigu Mecosikaloti ho nia jogadór sira, no promove inisiativa ba talentu foinsa’e Naimeco iha modalidade futeból.

“Kopa Mekosikaloti realiza ho intensaun atu hametin unidade pás no estabilidade iha komunidade nia leet, hodi haksolok hamutuk hasoru selebrasaun Natál-tinan foun, no haburas kresimentu ekonomia iha baze, no diverte komunidade iha suku no buka fini ba eventu futeból iha futuru,” nia katak.

Tanba planu hosi Komisaun Organizadora katak, realizasaun Kopa Mekosikaloti sei realiza kontinuasaun kada tinan ho prémiu taxa rotativa, no prémiu edukativu ba mellór jogadór no markadór inklui vensedór ba klubu sira, hodi promove ezisténsia klubu no jogadór sira.

Nune’e mós, implementasaun jogu iha Kopa Mekosikaloti realiza ho imparsiálidade, tan ne’e aas valór no regulamentu hosi FIFA no FFTL, no laiha diskriminasaun ba suku, rás, étniku, kór polítiku no relijiaun.

Entretantu, jogu ne’e realiza hahú iha loron 19 dezembru sei termina iha 15 janeiru 2022 ne’ebé envolve klubu-22, ne’ebé mai hosi suku Naimeco, Bobokase, Cunha perténsia sub-rejiaun Pante Makasa inklui suku Bobometo sub-rejiaun Oésilo. Sistema kompetisaun iha Kopa Mekosikaloti, adopta sistema hald kompetisaun, atu nune’e bele finaliza ho lalais tuir data ne’ebé komisaun determina ona.

Fonte finansiamentu ba Kopa Mekosikaloti ne’e mai hosi emprezáriu no intelektuál suku Naimeco, AFO no Autoridade RAEOA.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here