OMS entrega ekipamentu ICT ba servisu emerjénsia médika iha ambulánsia RAEOA. Imajen Tatoli/Abílio Elo Nini.

OÉ-CUSSE, 20 dezembru 2021 (TATOLI) – Organizasaun Mundiál Saúde (OMS) hamutuk ho Ministériu Saúde (MS), segunda ne’e entrega Information and Communication Technology (ICT) ba estabelesimentu sentru operasaun serbisu emerjénsia médika iha ambulánsia Rejiaun Administrativa Espesiál Oé-Cusse Ambeno (RAEOA).

Ekipamentu hirak-ne’e komposta hosi telefoni android ba sentru emerjénsia númeru 110, televizaun zoom meeting, edifísiu kompleta ho meza no kadeira, no jeradór unidade ida no seluk-tán.

Ministra Saúde, Odete Maria Freitas Belo, konsidera ekipamentu hirak-ne’e dezignada ba funsaun atu performa jestaun emerjénsia, ho nia papél ba komunikasaun no koordenasaun hodi responde ba situasaun emerjénsia sira.

Tanba iha komunikasaun koordenasaun, lojístika no iha rekursu oinoin, ne’ebé komtempla hamutuk iha edifísiu, nu’udar kapasidade preparasaun atu responde ba emerjénsia ne’ebé maka defini iha regulamentu sanitáriu internasionál.

Governante ne’e fó sai katak, objetivu hosi estabelesimentu ba ekipamentu iha kada munisipíu atu responde situasaun pandemia COVID-19, tanba seidauk hatene nia serteza bainhira maka lakon.

“Ekipamentu ICT sai nu’udar materiál esensiál ba jestaun fasilita ba komunikasaun vídeu konferénsia hodi apoiu serbisu ambulánsia liuhosi liña komunikasaun nune’e bele hetan informasaun hosi liña 110 no 119 nu’udar sentru informasaun ba COVID-19,” nia katak.

Nune’e mós bele hadi’a daudaun planu no prosedimentu jestaun emerjénsia no harii kapasidade ba resposta emerjénsia liuhosi formasaun no ezersísiu iha simulasaun sira-ne’ebé mak iha.

Prezidente Autoridade RAEOA, Arsénio Paixão Bano, orgullu no agradese ba Ministériu Saúde no OMS tanba to’o Oé-Cusse entrega ofisiál ekipamentu ICT ba estabelesimentu sentru operasaun emerjénsia saúde iha RAEOA.

“RAEOA agradese ba ida-ne’e, ha’u hanoin laiha susesu sein preparativu, sein organizasaun, entaun RAEOA sempre prontu simu inisiativa sira-ne’e, no hakarak halo intervensaun ne’e lais tanba RAEOA lakohi izoladu ho problema oinoin,” nia orgullu.

Entretantu, Country Director OMS, Arvid Mathur, orgullu tanba bele halo lansamentu ba sentru jestaun dazastre nian ne’ebé estabelese iha RAEOA hodi responde iha situasaun emerjénsia.

“Sentru operasaun jestaun dezastre hanesan fizikamente atu fó espasu ida, oinsá halo jestaun urjénsia ba setór saúde sira, atubele halo koordenasaun di’ak no operasaun oinsá ita fó informasaun, nomoos rekursu ne’ebé iha ho planu estratéjiku ba eventu ne’ebé iha relasaun ho saúde públiku iha tempu emerjénsia,” nia katak.

Governu apoia karreta ba RAEOA

Governu Sentrál apoia karreta distribuisaun ai-moruk ba servisu saúde RAEOA. Imajen Tatoli/Abílio Elo Nini.

Governu liuhosi Ministériu Saúde (MS), segunda ne’e apoiu karreta books hodi halo distribuisaun ai-moruk ba servisu saúde Rejiaun Administrativa Espesiál Oé-Cusse Ambeno (RAEOA).

Ministra Saúde, Odete Maria Freitas Belo, informa, Governu apoia fasilidade ne’e atu ajuda transporta ai-moruk ba iha baze, nune’e bele fasilita di’ak liután serbisu saúde sira hodi garante kualidade atendimentu ba komunidade.

“Governu Sentrál apoiu karreta distribuisaun ai-moruk nian ba servisu RAEOA, ne’ebé apoiu hosi JICA, ami hanoin katak, iha munisipíu 13 presiza iha transporte ruma, entaun RAEOA nian hetan ida, atu fasilita sira-nia servisu,” nia hateten.

Prezidente Autoridade RAEOA, Arsénio Paixão Bano, agradese ba Governu sentrál tanba apoia nafatin servisu saúde sira iha munisipíu, hodi fasilita profisionál saúde sira kona-ba atendimentu iha situasaun emerjénsia.

Jornalista         : Abílio Elo Nini
Editór               : Evaristo Soares Martins

PUBLISIDADEiklan