Ministru Administrasaun Estatál, Miguel Pereira de Carvalho, asina despaisu miniteriál konjuntu ho Ministra Saúde, Odete Maria Freitas Belo kona-ba mapamentu pesoál saúde munisípiu. Iha salaun Hotel Timor, segunda (21/12). Imajen Tatoli/Francisco Sony

DILI, 20 dezembru 2021 (TATOLI)— Ministériu Saúde (MS) ho Ministériu Administrasaun Estatál (MAE) asina despaisu ministeriál konjunta kona-ba halo mapamentu pesoál servisu saúde munisípiu atu fundamentu polítika desentralizasaun.

“Ita hamosu tan diploma konjunta atu ba oin bele estandariza  rekursu umanu iha munisipál liuhosi mapamentu pesoál servisu saúde ho baze ba rekerimentu hosi Komisaun Funsaun Públika (CFP,sigla Portugés) atubele fasilita iha rekrutamentu  no mós ho formasaun seluk,’’ Diretór Jerál Koorporativu Minsitériu Saúde,  Marcelo Amarál, hateten,  iha salaun Ótel Timor, Kolmera, Díli, segunda ne’e.

Diretor Jerál Serbisu Kooperativu, Ministériu Saúde, Marcelo Amaral. Imajen Tatoli/Francisco Sony.

Ministériu Saúde hamutuk ho Prezidente Autoridade no Administradór Munisípiu no Diretór sira, durante fulan ida, konsege finalizasaun mapa pesoál serbísu saúde munisípiu.

Nia dehan, produtu ikus hosi mapamentu ne’e atu sai hanesan guia ba instituisaun ne’ebé jere munisípál atubele servisu hamutuk priexe lacuna sira hodi haree ba rekursu umanu nian liuliu iha área rejime espesiál no rejime jerál.

Iha biban hanesan, Ministru Administrasaun Estatal (MAE), Miguel Pereira de Carvalho, hateten, mapamentu pesoál servisu saúde munisípiu nian di’ak tebes tanba servisu sira ne’e iha munispiu ba sentru saúde no postu saúde sira tantu iha nivél munisípiu sira atu fó atendimentu saúde ba komunidade sira.

Prezidente Komisaun Funsaun Públika (KFP), Faustino Cardoso Gomes. Imajen Tatoli/Francisco Sony

Entretantu, Prezidente Komisaun Funsaun Públika, Faustino Cardoso, hateten, pesoál saúde mak hanesan fatór determinante atu asegura realizasaun servisu iha ámbitu deskonsetrasaun hodi hakat ba desentralizasaun.

“Ita hahú deskonsentrasaun prinsipiu ne’ebé mak ami sempre haree mak legalidade iha ámbitu rekursu umanu nian,’’ nia akresenta.

Prezensa iha serimónia ne’e mak Ministra Saúde Odete Maria Freitas Belo, Diretóra Jéral Saúde Odete da Silva Viegas, Prezidente Autoridade Munisípiu, Administrador Munisípiu, Diretór Serbísu Saúde Munisípiu sira no seluk tan.

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here