Osan Dolar Amérika. Imajen/Espesiál

DILI, 20 dezembru 2021 (TATOLI)–Ministériu Finansa (MF) realiza ona pagamentu insentivu finanseiru estraordináriu ba suku sira iha munisípiu haat haat inklui Rejiaun Administrativa Espesiál Oé-cusse-Ambeno (RAEOA).

“Ministériu Finansa liuhosi Sekretariadu Tékniku Fundu COVID-19, realiza ona pagamentu insentivu finanseiru estraordináriu suku ba munisípiu haat hanesan Bobonaro, Dili, Manufahi, Viqueque no RAEOA,” refere nota ne’ebé Agência TATOLI asesu, iha segunda ne’e.

Pesoál sira ne’ebé hetan ona pagamentu kompostu hosi munisípiu Bobonaro na’in-1.581 ho orsamentu $42.160, Dili 903, Manufahi na’in-556 ho orsamentu $47.200, Viqueque na’in-882 ho orsamentu $46.080, no RAEOA na’in-279 ho orsamentu $14.400.

Nune’e, totál benefisiáriu hamutuk 4.201 ba períodu fulan-lima, hahú hosi jullu to’o novembru 2021, ho totál pagamentu millaun $893,600.

Enkuantu, iha loron 20 novembru, MF realiza uluk ona pagamentu insentivu estraordináriu suku ba munisípiu ualu hanesan, Aileu, Ainaro, Baucau, Covalima, Ermera, Lautém, Liquiçá, no Manatuto, ho totál benefisiáriu 5.507, ho montante pagamentu millaun $1,4.

Notísia relevante: MF realiza pagamentu insentivu estraordináriu suku ba munisípiu ualu

Pagamentu ne’e hala’o hafoin Ministériu Administrasaun Estatál (MAE) submete pedidu pagamentu ba Ministériu Finansa ho totál benefisiáriu 8.959, ho valór millaun $2,7.

Nune’e, instituisaun sira-ne’ebé Governu halo ona pagamentu suplementu remuneratóriu kompostu hosi Polísia Migrasaun, FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), Sala Situasaun Sentru Integradu Jestaun Krize (CIGC, sigla portugés), Ministériu Saúde kompostu hosi profisionál saúde munisípiu Dili, HNGV, no Ospitál Referál Baucau, no pesoál liña frente Guarda Prizionál, enkuantu instituisaun seluk iha prosesu verifikasaun.

Pagamentu hirak-ne’e hala’o tanba Prezidente Repúblika, Francisco Guterres Lú Olo, promulga ona alterasaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira orsamentu Jerál Estadu (OJE) 2021 ramata.

Dekretu-Lei kona-ba Suplementu Remuneratóriu define profisionál elejível hetan direitu mak médiku, enfermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentár (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia.

Nune’e mós Diresaun Nasionál Seguransa Patrimóniu Públiku, no servisu autoridade ka administrasaun munisipál, responsável ba halibur, lori no  soe lixu, sira-ne’ebé hola parte servisu autoridade ka administrasaun munisipál,  servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here