Ministru Edukasaun, Juventude no Desportu, Armindo Maia. Imajen TATOLI/Francisco Sony

DILI, 20 dezembru 2021 (TATOLI)–Ministru Edukasaun Juventude no Desportu (MEJD), Armindo Maia, ofisiálmente loke prosesu korresaun pontu ezame nasionál ne’ebé estudante finalista sira kompleta ona iha semana kotuk.

Iha biban ne’e, Ministru kongratula ekipa trabaalu ne’ebé konsege ultrapasa prosesu todan ida ne’ebé akontese kada tinan.

“Serbisu sira-ne’e ezije profisionalizmu hodi bele responde ezijénsia sira. Prosesu korresaun ne’e importante, tanba ne’e kontinua ezije hotu-hotu ninia vontade atu serbisu no iha sentidu profisionalizmu no integridade sai xave atu hetan susesu iha futuru,” Ministru hateten iha edifísiu MEJD, Villa verde, segunda ne’e.

Notísia relevante: MEJD enkoraja estudante finalista susesu iha ezame nasionál

Ministru dehan, serbisu ida bainhira atu hetan susesu presiza iha responsabilidade, pasiénsia no kuidadu segredu atu labele husik imajen ladi’ak iha futuru,” nia enkoraja.

Nune’e, governante ne’e apela ba ekipa hotu ne’ebé serbisu ba prosesu ezame lokál no ezame nasionál, atu kontinua garante profisionalizmu iha serbisu laran atu atividade korresaun hanesan prosesu ikus bele hetan rezultadu di’ak.

Nune’e mós, Koordenadór Unidade Kurríkulu Nasionál, Pedro Gonçalves Ribeiro, relata, korresaun pontu ezame nasionál ne’e sei la uza manuál, maibé mákina mak sei halo serbisu atu labele hamosu manipulasaun iha prosesu nia-laran.

“Prosesu ne’e sei hala’o durante semana ida nia-laran no rezultadu hotu sei finaliza iha loron 28 dezembru tinan ne’e,” nia akresenta.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here