VIQUEQUE, 20 dezembru 2021 (TATOLI)—Estudante hamutuk na’in-269 hosi munisípiu Viqueque, iha segunda ne’e, tuir teste atu asesu ba Universidade Nasionál Timor Lorosa’e (UNTL) no Institutu Públiku Betanu (IPB).
Iha teste ne’e, Diretór Edukasaun Munisípiu Viqueque, Emidio Amaral, hateten, Ministériu Ensinu Superiór, Siénsia no Kultura (MESSK) hamutuk ho reprezente UNTL no IPB mak fó teste ba aplikante sira.
“Ita-nia estudante sira ne’e akaba ona sekundáriu hosi tinan 2017 to’o 2020 maka tuir teste, ho totál hamutuk na’in-269, kompostu hosi Siénsia Teknólojia, Siénsia Sosiál no Eskola Tékniku Vokasionál,” Diretór Edukasaun informa ba Agência TATOLI, iha Eskola 01 Pré-Sekundáriu Viqueque villa.
Notísia relevante: UNTL foin simu inskrisaun estudante hamutuk 3.870
Teste fahe ba parte tolu, ohin ba Siénsia Teknólojia maka teste uluk, aban Siénsia Sosiál no bain-rua mak Eskola Tékniku Vokasionál.
“Ezame iha tinan ida-ne’e ha’u haree grau la hanesan ba rejime espesiál no rejime jerál. Hafoin ezame hotu maka MESSK tetu estudante ne’ebé mak pasa,” nia akresenta.
Tuir dadus estudante hosi Eskola Tékniku Vokasionál na’in-15, Siénsia Sosiál na’in-192 no Siénsia Teknolojia na’in-62.
Iha fatin, Reprezentante ekipa MESSK, Francisco da Silva, hateten, nia parte seidauk iha dadus fixu estudante asesu ba rejime espesiál no jerál.
“Ami ladún hatene númeru estudante sira. Kona-ba kritériu tuir teste hanesan rejime espesiál ba veteranu sira-nia oan la haree valór, rejime jerál atu konkorre ba medisina jerál ho valór matéria Biolojia, Matemátika, Kímika tenki 8 ba leten mak bele hili área ne’e,” Francisco dehan.
Jornalista : Vitorino Lopes da Costa
Editora : Julia Chatarina
