Ministru Edukasaun Juventude no Desportu (MEJD), Armindo Maia, halo abertura ezame nasionál iha Eskola Ensinu Báziku Sentrál (EBC, sigla portugés), Farol, segunda (13/12). Imajen/MEJD

DILI, 20 dezembru 2021 (TATOLI)–Diretór Servisu Edukasaun munisípiu Viqueque, Manufahi Covalima no Ainaro kontinua esforsu atu estudante finalista 176 ne’ebé la partisipa ezame nasionál dahuluk bele partisipa iha faze daruak.

Diretór Servisu Edukasaun Ainaro, Celestino Magno Pereira, hateten, sira halo ona identifikasaun ba estudante finalista ne’ebé la tuir ezame nasionál iha xamada dahuluk hamutuk estudante finalista 33.

“Estudante sira  la partisipa ezame nasionál ho razaun balun moras no balun laiha informasaun, maibé parte eskola nafatin hein sira-nia prezensa. Hosi totál estudante 33 ne’ebé auzente, ita sei realiza fali xamada daruak ba sira atu mai tuir fali ezame nasionál, tanba sira iha direitu, tanba ne’e bainhira ita la esforsu maka sira sei lakon direitu ba tinan ida-ne’e,” Diretór Celestino informa ba Agência TATOLI, via telefónika, segunda ne’e.

Notísia relevante

Estudante finalista ne’ebé rejista iha Diresaun Edukasaun munisípiu Ainaro hamutuk 1.733, maibé estudante 1.700 de’it mak partisipa iha ezame nasionál dahuluk.

Iha sorin seluk, Diretór Servisu Edukasaun Viqueque, Emídio Amaral, informa, totál estudante finalista hamutuk 3.083, maibé estudante finalista ida hosi Eskola Ensinu Báziku 08 agostu bi-karin siklu 3 maka la partisipa ezame nasionál ho razaun estudante ne’e hakarak ajuda de’it inan-aman iha to’os.

“Ami simu informasaun hosi eskola no bainhira parte eskola rona novidade ne’e, delega kedan ekipa atu ba konvense estudante ne’e atu filafali mai eskola, maibé estudante ne’e la muda ninia desizaun hodi nafatin lakohi tuir ezame nasionál tanba atu ajuda ninia inan-aman,” nia akresenta.

Iha sorin seluk, Diretór Servisu Edukasaun Covalima, Edmundu Pereira, relata katak estudante finalista ne’ebé auzente iha ezame nasionál iha tinan ne’e hamutuk na’in-sia, ne’ebé iha estudante na’in-tolu moras no na’in-neen laiha informasaun, maibé parte eskola husu ona pontu ezame hosi nasionál atu realiza fali ezame daruak ba estudante sira.

Nune’e mós, tuir Diretór Munisípiu Dili, Carlito Soares, informa, totál estudante finalista iha Dili hamutuk 16.173, maibé iha estudante na’in-128 maka la partisipa iha ezame nasionál.

Enkuantu, munisípiu Manufahi iha totál estudante finalista ne’ebé auzente iha ezame nasionál hamutuk na’in-lima, maibé parte edukasaun kontinua buka dalan hodi rezolve problema sira ne’e atu estudante sira labele lakon direitu.

Koordenadór Unidade Kurríkulu Nasionál, Pedro Ribeiro, hateten, estudante finalista sira ne’ebé la konsege tuir ezame nasionál iha xamada dahuluk, unidade ne’e sei loke ona xamada daruak hahú ohin ba estudante sira iha territóriu nasionál.

Hosi Dili Estudante kuaze 40 mak partisipa ona ezame iha Ministériu Edukasaun Juventude no Desportu (MEJD) no hein katak to’o sesta estudante sira bele finaliza ezame nasionál.

“Ba munisípiu sira, ohin Diretór Servisu Edukasaun mai foti ona pontu ezame hodi realiza ezame nasionál daruak ba estudante sira,” nia tenik.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here