Estudante sira simu Prezidente Republika, Francisco Guterres Lú Olo bainhira vizita ba Eskola Sekundária Jerál Públiku (ESJP) Seran-Kotek, Munisípiu Covalima, Kinta (27/06/2019). Imajen TATOLI/Eugénio Pereira.

COVALIMA, 20 dezembru 2021 (TATOLI)—Superintendente Edukasaun Covalima, Francisco Cardoso informa, estudante finalista na’in-17 iha Covalima mak la tuir ezame nasionàl no lokál tanba mate no balun deside sai hosi eskola.

Notísia Relevante: MEJD distribui matéria ezame nasionál ba munisípiu sira

“Kona-ba estudante finalista na’in-17 la tuir ezame nasionàl no lokál, razaun tanbasá ida ami la hatene. Ami simu de’it relatóriu hosi eskola maibé bazea informasaun balun dehan mate no balun deside sai hosi eskola,” Francisco Cardoso dehan ba Agência Tatoli, iha nia knar fatin, segunda ne’e. 

Estudante na’in-17 ne’ebé la tuir ezame nasionàl no lokál ne’e mai hosi eskola bàzika sentrál (EBC, sigla portugés) na’in-11 ne’ebé kompostu hosi mane na’in-lima (5) no feto na’in-neen (6).

Bazea ba dadus ne’ebé edukasaun munisípiu Covalima simu ba tinan akadémiku 2021 ne’e, estudante finalista hosi EBC hamutuk 1,628. Hosi númeru ne’e estudante ne’ebé tuir ezame hamutuk 1,617 no na’in-11 mak la tuir ezame nasionàl no lokál.

Aleinde ne’e, nia informa, aha Covalima tuir loloos estudante hosi Ensinu Sekundária Jerál hamutuk 861 mak tuir ezame nasionál no lokál, maibé tanba estudante na’in-neen (6) la tuir ezame entaun hela ema na’in-855 mak tuir ezame.

Estudante hosi Ensinu Sekundária Téknika Volasionál Akar-Laran hamutuk na’in-72, Ensinu Sekundária Tékniku Vokasionál Kristál 48, Ensinu Sekundáriu Tékniku Vokasionál Zumalai 115, Ensinu Sekundária Tékniku Vokasionál Fohorem 16, Ebsinu Sekundária Tékniku Volasionál Klaret Salele na’in-49.

Ohin, ha’u hateten ona ba sira-ne’ebè mak la tuir ezame ne’e na’in-11, ne’ebè mai hosi EBC Fatululik na’in-rua (2), EBC Fohorem na’in-ida (1), EBC Dato Tolu na’in-ida (1), EBC Tacilin na’in-ida (1), EBC Bulu na’in-ida (1), EBC Santu Luiz Gonzaga na’in-ida (1), EBC Beco na’in-tolu (3), EBC Suai Loro na’in-ids (1),” nia haktuir. 

Maske finaliza ona ezame nasionàl no lokál maibé parte Edukasaun Munisípiu Covalima seidauk hatene bainhira mak atu fó sai rezultadu ezame nian, tanba iha kalendáriu ezame nian ne’e Governu liuhosi Ministériu Edukasaun la define. 

Bazea ba kalendáriu normál, ezame nasionàl hahú iha fulan-outrubru maibè ministériu relevante halo alterasaun, entaun kalendáriu ezame nasionàl muda fali ba iha loron 13 fulan-dezembru tinan 2021 ne’e.

“Ita-boot sira hatene eskola dala ruma la’o no la la’o, entaun ezame nasionál mós muda ba fulan dezembru. Maibé, kona-ba atu fó sai rezultadu ezame nian ne’e seidauk fò mai ami munisípiu atu hatene bainhira mak atu fó sai. Agora seidauk fó hatene, tanba hafoin finaliza ezame, loron ida ka rua ita atu selebra loron Natál no tinan foun. Hosi nasionàl mós seidauk halo koresaun ba matéria ezame nasional,” nia dehan.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here