Ezame admisaun asesu UNTL-IPB, segunda (20/12). Imajen/Espesiál

DILI, 20 dezembru 2021 (TATOLI)–Ministériu Ensinu Superiór Siénsia no Kultura (MESSK), segunda ne’e, halo abertura ezame admisaun estudante 218 hosi munisípiu Covalima ne’ebé atu asesu ba Universidade Nasionál Timor-Lorosa’e (UNTL) no Institutu Politékniku Betano (IBP).

Reprezentante MESSK, Sebastião Manuel Pereira, informa, estudante ne’ebé ohin tuir ezame admisaun ne’e akaba ona eskola ensinu sekundáriu hosi tinan akadémiku 2017 to’o 2020.

“Estudante sira kompostu hosi kursu siénsia teknolojia, siénsia sosiál no tékniku vokasionál,” Sebastião Manuel hateten ba Agência TATOLI, via telefónika.

Teste ba ezame admisaun ne’e sei hala’o durante loron-tolu, ne’ebé loron dahuluk ba matéria siénsia teknolojia, loron daruak ba matéria siénsia sosiál no ikus ezame ba tékniku vokasionál.

Enkuantu, estudante 218 ne’ebé partisipa ezame admisaun ne’e kompostu hosi estudante siénsia teknolojia na’in 134, siénsia sosiál 45 no tékniku vokasionál 39.

Abertura ezame admisaun iha territóriu nasionál ne’e realiza dala-ida de’it, ne’ebé ohin hahú no sei remata iha kuarta (22/12), hafoin rezultadu sei anunsia tuir desizaun ministériu nian.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here