Kandidatu Estudante UNTL no IPB hala’o teste iha Ensinu Sekundária Públiku Númeru 1 Vila Nova, Baucau, segunda (20/12). Imajen Tatoli/Natalino Belo.

BAUCAU, 20 dezembru 2021 (TATOLI) – Estudante Ensinu Sekundária hosi munisípiu Baucau hamutuk na’in-672 hahú teste atu asesu ba Universidade Nasionál Timor Lorosa’e (UNTL) no Institutu Politéknika Betano (IPB).

Pontu Fokál Lisensiamentu no Akreditasaun hosi Ministériu Ensinu Superiór, Siénsia no Kultura (MESSK), Zito de Jesus Soares, esplika, prosesu teste atu asesu iha UNTL no IPB.

Estudante hirak-ne’ebé atu asesu ba UNTL no IPB hamutuk tipu tolu hanesan oan veteranu, família kbiit laek no sub-rejime oportunidade, ne’ebé kompostu hosi eskola siénsia teknolojia, siénsia sosiál umanidade no siénsia tekniku vokasionál sira iha munisípiu Baucau.

Pontu Vokál Lisensiamentu no Akreditasaun Ministériu Ensinu Superiór Siénsia no Kultura (MESSK), Zito de Jesus Soares. Imajen Tatoli/Natalino Belo.

“Ohin, sira tama ona ba ezame atu asesu ensinu superiór, iha-ne’e kandidatu hamutuk na’in-672, ne’e kompostu hosi 474 mai husi sub-rejime oportunidade, oan veteranu hamutuk 130 no 68 ne’e familia kbiit laek nian,” Pontu Fokál MESSK ko’alia iha Vila Nova, segunda ne’e.

Prosesu ezame refere sei hala’o durante loron-tolu hahú hosi segunda to’o loron-kuarta, ne’ebé loron dahuluk siénsia teknolojia, siénsia sosiál no taka ho tékniku vokasionál.

“Rezultadu sei hein rejime jerál ne’ebé mak finalista foin lalais hala’o ezame, sira-nia valór ezame nasionál sai tiha mak kontinua ba sira-ne’ebé ezame agora, nune’e rezultadu fó sai dala-ida,” Zito akresenta.

Estudante ne’ebé finalista iha tinan 2017 to’o 2020 ne’ebé la’ós veteranu oan tama kategria sub-rejime oportunidade. Enkuantu veteranu oan no família kbiit laek laiha limitasaun tinan remata ensinu sekundária.

Prosesu simu estudante foun ne’e bazea ba diploma ministeriál númeru 58/2021, 16 agostu kona-ba asesu ensinu superiór públiku.

“Ita fiar laiha ona problema tanba prosesu tomak ita prepara ona, ezekuta tuir diploma ministeriál kona-ba asesu ensinu superiór nian,” nia hateten.

Entretantu, tuir planu tinan akadémiku 2022 totál estudante universitáriu ne’ebé atu asesu iha UNTL no IPB hamutuk rihun haat-resin.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here