Atividade desportu eskolár iha kampu demokrasia, Viqueque villa, segunda (20/12). Imajen TATOLI/Vitorino Lopes da Costa

VIQUEQUE, 20 Dezembru 2021 (TATOLI)–Edukasaun munisípiu Viqueque realiza atividade desportu eskolár ba eskola ensinu sekundáriu jerál, katóliku no tékniku vokasionál hamutuk 10, ho objetivu atu dezenvolve desportu no promove estudante sira-nia talentu.

“Iha eskola rua hanesan Ensinu Sekundáriu Daraloi no Cristal Viqueque maka la partisipa iha desportu eskolár ho razaun sira laiha preparasaun,” Prezidente Komisaun organizadora desportu eskolár, Emidio Amaral, hateten ba Agência TATOLI, iha kampu demokrasia, Viqueque villa, segunda ne’e.

Tuir Responsável atividade, inisiativa ne’e bele promove no dezenvolve talentu estudante sira iha área desportu.

“Desportu eskolár ne’e ho modalidade futeból, atletizmu no voleiból ba feto no mane,” nia akresenta.

Atividade desportu eskolár ne’e hahú loron 20 dezembru no sei ramata iha loron 23 dezembru 2021, ne’ebé jogu futeból opta sistema ‘gugur’, ekipa ne’ebé lakon sei la hasoru adversáriu seluk.

Atividade ne’e hetan apoiu orsamentu hosi Sekretaria Estadu Juventude no Desportu (SEJD) hamutuk $16.500.

Eskola ne’ebé partisipa iha atividade ne’e mak hanesan Ensinu Sekundáriu Olocassa Ossu, Ensinu Sekundáriu Calixa Viqueque, Ensinu Sekundáriu 04 setembru Viqueque, Ensinu Sekundáriu Katóliku Santa Madelena Canosa Ossu, Ensinu Sekundáriu Jerál Uatucarbau, Ensinu Sekundáriu Jerál Sabika Uatulari, Tékniku Vokasionál Kalo-Heda, Ensinu Sekundáriu Katóliku Estevão Viqueque, Ensinu Sekundáriu Costal Lacluta no Tékniku Vokasionál Rabina Lacluta.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here