Pamfletu iha komemorasaun loron-16 ativizmu kontra violénsia bazeia ba jéneru, sesta (26/11). Imajen TATOLI/António Gonçalves

DILI,20 dezembru 2021 (TATOLI)— Diretór Nasionál Saúde iha Familia, Vitór Soares, hateten, Ministériu Saúde planu harii fatin hakmatek-ualu iha munisípiu-sira ba ema ho vitíma violénsia bazeia ba jenéru.

“Iha tinan 2021 ba 2022, ita harii tan fatin estabelesimentu ualu ba ema ho vítima violénsia bazeia ba jenéru ne’ebé halo hotu ona levantamentu husi enjeñeriu sira no prodús ona dezeñu ho Bill Of Quantity (BoQ) tuir orsamantu ne’ebé mak kolokadu  ba tinan 2022 ninian,’’ Diretór Vitór, hateten iha City8, Manleuana-Dili, segunda ne’e.

Daudaun, Ministériu Saúde mós halo ona kapasitasaun ba professional saúde sira hanesan Médiku, Parteira no Enfremeira atu fó atendimentu ba kazu violénsia bazeia ba jenéru iha Sentru Saúde Internamentu sia ne’ebé eziste iha territóriu-laran.

Sentru saúde internamentu sia ne’e, kompostu hosi munisípiu Lautém, Viqueque, Manatuto , Same, Ainaro, Aileu,  Liquiça no Ermera iha rua ida iha Sentru Saúde Gleno no iha Sentru Saúde Guisarudo.

“Ita fó ona treinamentu no kapasitasaun ba sira inklui Diretór munisípiu no xefe sentru saúde tanba kazu violénsia bazeia ba jenéru ne’e la’ós kazu bainbain no la’ós hanesan pasiente bainbain tau hamutuk ho pasiente jerál, maibé buka fatin multifunsaun  ida  atu ezame  ba kazu sira ne’ebé mak ligadu ba violénsia bazeia ba jenéru,’’nia afirma.

Jornalista  : Felicidade Ximenes

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here