Ministériu Saúde liuhosi Diresaun Nasionál Saúde iha Família, kolókiu Nasionál kona-ba Sistema vizilánsia mortalidade inan no perinatal. Imajen/ Felicidade Ximenes.

DILI, 20 dezembru 2021(TATOLI)— Ministériu Saúde liuhosi Diresaun Nasionál Saúde iha Família, iha tinan 2020, konsege rejista kazu mortalidade inan hamutuk 25.

“Hosi númeru mortalidade inan hamutuk 25 ne’ebé rejista, kompostu mai hosi Hospitál Nasionál Guidu Valadares (HNGV) no ospitál referál na’in-16 no husi munisípiu hamutuk sia. Ne’ebé númeru mortalidade boot mak hosi HNGV no munisípiu Ermera,” Diretór Nasionál Saúde iha Família, Ministériu Saúde, Vitór Soares, informa ba jornalista sira, bainhira hala’o kolokiu Nasionál kona-ba Sistema vizilánsia mortalidade inan no perinatál ho resposta, iha City8, Manleuana-Dili, segunda ne’e.

Tuir dadus iha tinan 2020, kazu inan-mate ne’e akontese ba grupu idade 30 to’o 39 ho metade 52%, idade 20 to’o 29 ho 32% no inan ne’ebé mak idade menus 19 no liu 40 ho 8%.

Nune’e, Nia dehan objetivu kolokiu ne’e atu fó informasaun ba ospitál referral no postu no sentru saúde sira atu halo atividade vizilánsia ba mortalidade inan ho mortalidade bebé.

Diretór ne’e dehan haree progresu servisu kada entidade sira ladun la’o másimu, nune’e iha 2022, presiza reforsa iha sistema nasionál saúde atu redús  inan no bebé mate iha ospitál nomós iha komunidade nia le’et.

“Ita mós halo kapasitasaun ba profisionál saúde sira hanesan médiku, Enfermeiru no Parteira kona-ba  intervensaun sira bainhira inan no oan mate iha fasilidade saúde no iha komunidade.  Ho objetivu ita atu halo autopsia tanba inan no bebé mate tanba kauza saida atu sira iha interkonesaun ba malu liuliu Parteira, Médiku no Enfermeiru,’’ Nia dehan.

Iha biban hanesan, Reprezentante UNFPA, Domingas Bernardo, agradese ba Minsitériu Saúde liuliu Departamentu Saúde Maternal Infantil ne’ebé implementa ona programa sistema vizilánsia mortalidade maternál no perinatál ne’ebé suporta hosi UNICEF no doadór sira seluk.

‘’Ha’u hanoin ita halo buat barak ona, maibé ha’u observa katak kualidade mak sei iha problema hanesan ema mate, entaun ba oin esforsu an hodi hamenus  inan  mate iha fasilidade saúde no mós iha ospitál sira,’’ reprezentate UNFPA  rekomenda.

Jornalista  : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here