Poetiza timor-oan, Alexandra de Araújo Tilman “Sandra Tilman”. Imajen/Espesiál

DILI, 19 dezembru 2021 (TATOLI) – Poetiza Timór-oan, Alexandra de Araújo Tilman, daudaun ne’e harii ona klibur ida ho naran ‘Sandra Timan’ atu kapasita jerasaun foun sira hodi kontinua obra saudozu Francisco Borja da Costa iha área literatura.

Klibur Sandra Tilman ne’e harii hosi Profesora Literatura Dalen Tétun hosi Fakuldade Edukasaun Arte Umanidade, Universidade Nasionál Timor Lorosa’e (UNTL), Alexandra de Araújo Tilman

Poetiza Alexandra Tilman rejista ona klibur ne’e iha Notariadu, Ministériu Justisa no oras ne’e hein hela legalidade hafoin hala’o formasaun ba estudante sira iha área literatura. Bainhira hetan ona legalidade hosi Ministériu Justisa sei hahú atividade kona-ba literatura iha Timor-Leste.

Klibur Sandra Tilman ne’e sei akumula estudante sira hahú hosi ensinu báziku terseiru-siklu, ensinu sekundáriu no universitáriu.

“Ami harii ona klibur ne’e tanba daudaun ne’e Ministériu Edukasaun prepara ona planu atu enkaixa matéria literatura iha kurríkulu nasionál. Kuandu planu sira-ne’e maka realiza duni klibur preparadu ona hodi responde mehi saudozu Borja da Costa nian,” Alexandra Tilman informa ba Agência Tatoli, iha Fakuldade Siénsia Sosiál, UNTL, Kaikoli, sábadu.

Poetiza seniór ne’e hatutan, mehi hakarak harii klibur Alexandra Tilman ne’e ho intensaun atu hatutan saudozu Francisco Borja da Costa nia obra kona-ba kontribuisaun luta rai ida-ne’e liuhosi liafuan sira-ne’ebé nia hakerek.

Nune’e mós dadolin tuir anin nu’udar estratéjia ida iha rezisténsia tanba espíritu Borja da Costa nia motivasaun ba jerasaun foun sira atu kontinua obra ida-ne’e.

Sandra haktuir, klibur ne’e rasik iha ona matéria lubuk maka atu fahe ba jerasaun foun sira bainhira hetan ona lisensa hosi notariadu.

Matéria sira atu hanorin ba jerasaun foun sira alende hakerek no lee poezia, klibur mós iha programa debate ka diskursu públiku atu prepara poétiku no poetiza ne’ebé di’ak iha futuru.

Matéria seluk atu hanorin ba jerasaun foun sira maka oinsá atu aprende hakerek konseitu proposta ho di’ak. Tanba programa ida-ne’e importante tanba jerasaun foun sira nune’e atrai ema seluk nia laran liuhosi proposta atu ema-bele atende lalais.

Tuir nia, klibur ne’e harii la buka lukru maibé programa kapasitasaun ne’ebé sei fahe ba jerasaun foun sira ne’e ho intensaun hakarak jerasaun foun bele sai fali Alexandra Tilman, Abel Barreto no Travolta foun iha futuru atu hatutan mehi Borja da Costa nian.

Sandra Tilman hetan ona rekoñesimentu internasionál hosi Austrália no Indonézia nu’udar “Best Focal For Poetry” tanba ninia karaterístika lee poeza ho lian ne’ebé aas no bele hamout ema-nia sentimentu.

To’o iha biban ne’e, Sandra Tilman hakerek ona livru haat (4) ho ninia títulu mak hanesan Mengenal Tradisi Lisan Mambae (kultura), Lian Rai-Nain (Antalojia Poezia Tetun, Bhs Indonesia, Inglés no Portugés),  Mata-dalan Musidade (Lideransa), Nyanyian Para Arwah (Antalojia Poezia), no livru sira seluk ne’ebé sei prepara ba produsaun mak hanesan Saudozu (Antalojia Poezia Eroi), Ami Lian Laek (Antalojia Drama).

Biografia badak

Alexandra de Araújo Tilman koñesida ho naran Sandra Tilman, moris iha loron 28 maiu 1976 iha Postu Administrativu Maubisse, Munisípiu Ainaro. Poetiza (feto) Timoroan ne’e hala’o moris ho lema “Dezáfiu sira mosu la´ós atu ita sees tiha, maibé tenke hakat Liu”.

Sandra Tilman hasai Estudu kona-ba língua no literáriu no esperiénsia hanorin literáriu hahú tinan 1996 SMPK São José Balide no SMA Negeri 1 Dili.

Iha tinan 2000 to´o 2008 hanorin iha São José Balide iha matéria Bahasa dan Sastra 2008 no ohin loron nu´udar dosente permanente iha UNTL, Fakuldade Edukasaun Arte no Humanidade, Departamentu Dalen-Tetun no Ekipa Institutu Nasionál ba Linguístika(INL) iha UNTL nu’udar eskritora no tradutora.

Notisia relevante: Sandra Tilman hetan rekoñesimentu internasional nu’udar “Best Focal For Poetry”

Jornalista         : Tomé Amado

Editór               : Evaristo Soares Martins 

PUBLISIDADEiklan

HAKEREK NO HATÁN

Please enter your comment!
Please enter your name here