Emprezáriu Mahoka entrega xave ba postu tránzitu Tasi- Tolu ba Komadante PNTL, Komisáriu Faustino da Costa. Imajen Tatoli/Natalino Costa.

DILI, 19 dezembru 2021 (TATOLI) – Kompañia Rudal lideradu Salvador Henrique ‘Mahoka’ konstrui tán postu tránzitu ida iha área Tasi-Tolu no domingu ne’e entrega ona ba Ministériu Interior.

Postu polísia tránzitu ne’e inaugural hosi Vise Ministru Interior (MI), António Armindo, akompaña hosi Komandante Jerál Polísia Nasionál Timor-Leste (PNTL), Komisáriu Faustino da Costa.

Vise Ministru Interior, António Armindo, apresia ho emprezáriu timór-oan Mahoka tanba ho fuan boot konstrui ona postu tránzitu ba membru PNT hala’o serbisu.

“Ita iha fulan kotuk ita halo inaugurasaun ba postu tránzitu neen, ne’ebé konstrui hosi emprezáriu Mahoka no ohin ita kontinua hetan apoia hodi inaugura postu polísia tránzitu iha Tasi-Tolu,” governante ne’e fó apresiasaun iha ámbitu inaugurasaun postu polísia tránzitu, iha Tasi-Tolu.

Iha fatin hanesan, Komandante Jerál PNTL, Komisáriu Faustino da Costa, agradese ba emprezáriu Mahoka tanba bele konstrui tán postu tránzitu ba membru tránzitu atu halo serbisu kontrola movimentu roduviáriu.

“Husu ba ita-boot sira atu uza fatin ida ne’e  24 oras hodi halo serbisu, labele abandona postu ida-ne’e menutu ida nune’e asegura roduviáriu,” Komisáriu Faustino apela.

Entretantu, Diretór Kompañia Rudál, Salvadór Hendrique “Mahoka”, hakarak ajuda hodi konstrui postu tránzitu iha Tasi-Tolu atu ajuda membru PNTL kontrola ema-ne’ebé uza viatura tenke tuir regra tránzitu nian.

“Dala barak ita haree Tasi-Tolu ne’e dook hosi sentru kapitál, ema liu ba liu mai la uza kapasete, iha área ida-ne’e konflitu sempre mosu, susar ba polísia atu atende, tanba ne’e inisiativa hakarak konstrui postu tránzitu iha-ne’e atu minimiza problema sira-ne’e,” nia tenik.

Mahoka promete sei konstrui tán postu tránzitu ida iha área Bebonuk, nune’e mós iha fatin seluk ne’ebé maka komunidade sira presiza PNTL nia prezensa.

Postu polísia trázitu ne’ebé lokaliza iha área Tasi-Tolu ne’e konstrui durante fulan-ida no oras ne’e entrega ona ba Governu, nune’e PNTL bele utiliza.

Jornalista       : Natalino Costa

Editór             : Cancio Ximenes

PUBLISIDADEiklan