Ilustrasaun inan isin-rua. Imajen/Espesiál

DILI, 18 dezembru 2021 (TATOLI)—Diretór Nasionál Saúde iha Familia, Vitor Soares, hateten Ministériu Saúde liuhosi Departamentu Saúde Materna Infantil halo kobertura kuidadu Antenatal Care (ANC) iha tinan ida-ne’e la másimu tanba situasaun COVID-19.

Iha tinan 2021, inan isin-rua neebe vizita fasilidade saúde iha periódu trimestre atinje de’it 74% iha nivél nasionál no kompleta vizita dala haat durante isin-rua atinji 62%, entaun hosi ne’e totál inan isin-rua hamutuk 41,420.

“Inan isin-rua ba vizita fasilidade saúde tarde no inan balun ba fasilidade saúde dook tanba estrada, entaun ita hatene katak iha área rurál sira tun foho no sae foho depois la’o ain de’it, sira deside hodi la ba fasilidade saúde hodi kontinua halo examinasaun ba dala ikus nian,” Diretór Nasionál Saúde iha Familia, Victor Soares, hateten ba Agência TATOLI iha salaun Mahoka 17 12 21, Dili, sesta ne’e.

Hahú iha fulan janeiru to’o setembru 2021, servisu sira-ne’e la’o ladún másimu no ladún mínimu entaun signifika foin relata kuarter datolu nian ba kuarter da haat nian seidauk relata tanba dadus seidauk rekolla hosi entidade hotu-hotu ne’ebé presta hela servisu kuidadu saúde primaria nian.

Husi dadus ne’ebé mak aprezenta finál katak sira halo ona rejustifikasaun konfirmasaun kona-ba dadus mak sira relata katak totál inan isin-rua iha tinan 2021 atinje 74% kompara ho tinan 2020 atinje 91%, signifika iha tinan 2020 numeru di’akliu duké agora nian.

“Ita hatene katak daudaun ne’e iha situasaun COVID-19, inan sira balun ba asesu iha fasilidade saúde no balun hela iha área rurál ne’e labele asesu ba iha fasilidade saúde. Ezemplu inan isin-rua bainhira asesu ba iha fasilidade saúde ne’ebé mak besik no balun la asesu entaun balun  pesoál saúde  vizita uma kain hanesan liuhusi programa SISKA, liuhosi vizita saúde iha família entaun sira  balun tarde  ba iha Antenatal Care (ANC) tanba loloos sira tenke liuhosi periódu trimestre  to’o kompleta vizita  dala haat durante isin-rua,” nia dehan.

Tanba ne’e, nia dehan, iha tinan 2022 iha departamentu saúde materna infantil hasa’e kobertura ba iha Antenatal Care (ANC) periódu trimestre to’o kompleta vizita dala haat durante isin-rua.

“Ita haree, COVID-19 menus ona fó espasu ka biban ba pesoál saúde sira atu bele halo intervensaun. Agora intervensaun dahuluk ne’ebé mak ita atu halo mak vizita saúde iha família  hodi vizita kada uma kain  ba individu ba uma kain ida. Agora, hosi vizita uma kain halo diagnostiku partisipatóriu nomós rejistu saúde eletrónika,” nia dehan.

 Bainhira ba vizita mak iha inan isin-rua seidauk ba fasilidade saúde ka seidauk halo Anti Natal Care dahuluk, daruak to’o dahaat, sira tenkei iha obrigasaun atu halo iha fatin familia ne’e rasik. Maibé, dalabarak iha inan sira-ne’ebé mak laiha komplikasaun ruma, sira direta simu Antenatal Natal Care (ANC) iha sira-nia fatin tanba iha médiku, enfereirmu, no parteira sira kompletu.

Ministra Saúde, Odete Maria Freitas Belo, rekuñese iha tinan rua nia laran progresu no dezafiu ne’ebé mak Ministériu Saúde hasoru mak iha situasaun COVID-19 afeta liu ba servisu esensiál sira.

“Ita-nia atinjementu númeru ha’u ladún hatene maibé ita haree katak inan isin-rua sira nafatin ba vizita fasilidade saúde nomós ita konsulta ba moras hada’et no lahada’et sira. Entaun, servisu sira-ne’e ita kontinua halo iha tinan ida-ne’e. Agora, ita mós kontinua tau matan ba moras hipertensaun, diabetes, sofre korasaun. Atividade ensensiál sira ita nafatin tau matan no ita la husik leet servisu sira-ne’e,” Ministra Saúde, Odete Maria Freitas Belo, informa.

Jornalista : Felicidade Ximenes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here