Dezeñu investimentu turíztiku iha área Tasi-tolu hosi Pelican Paradise. Imajen/espesiál

DILI, 18 dezembru 2021 (TATOLI)—Governu liuhosi Ministériu Koordenadór Asuntu Ekonómiku (MKAE), sesta ne’e (17/12/2021), tuir loloos realiza selebrasaun akordu investimentu espesiál ho empreza Pelican Pradise, maibé serimónia ne’e adia ba fali 10 janeiru 2022.

Notísia Relevante: Pelican Paradise preokupa seidauk iha akordu investimentu afeta ba planu

“Ami espera problema internál Governu bele rezolvidu tuir data no orariu ne’ebé fó ona. Nune’e loron fiksu ba asina akordu investimentu ne’e sei hala’o fali iha 10 janeiru 2022 bazei ba gaarantia ne’ebé fó ona.,” Prezidente Pelican Paradise Group, Edward Ong, hateten liuhosi nota imprensa ne’ebé Agência Tatoli asesu, sábadu ne’e.

Prezidente Pelican Paradise Group haktuir, iha 16 dezembru 2021, Rezolusaun númeru 133/2021 ne’ebé kontein Akordu Investimentu Espesiál no nia Anexu publika iha Jornal Repúblika.

Tanba ne’e, iha 16 dezembru 2021 ne’e mós Pelican Paradise simu konvite formál ba serimónia asina Akordu Investimentu Espesiál ne’ebé sei hala’o iha 17 dezembru 2021.

“Pelican Paradise iha 17 dezembru 2021, hetan informasaun hosi Ministru Koordenadór Asuntu Ekonómiku, Joaquim Amaral, iha sala enkontru MKAE bainhira hein hela serimónia asinatura hahú. Katak, parte balun husi Akordu Investimentu Espesiál de’it mak agora bele asina. Esplikasaun ne’ebé fó katak Ministru Justisa hakarak aumenta klauzula foun ba Anexu maske antes ne’e asuntu refere la diskute ka publika iha Rezolusaun 133/2021,” Edward Ong esplika.

Nia hatutan, rona tiha ne’e, Pelican Paradise la simu pedidu ne’ebé hala’o iha tempu asinatura ne’e, tanba ne’e simplesmente hatudu má-fé absoluta, la profisionál no etis atu husu mudansa ne’ebé seidauk diskute iha Dezisaun formál Governu 133/2021 iha tempu atu asina daudauk ona.

“Pelican Paradise ho respeitu hakarak kumpre Rezolusaun Governu 13/2021 ne’ebé publika ona. Pelican Paradise aseita ona akordu mudansa ka alterasaun ne’ebé husu hosi Konsellu Ministru no la husu hodi halo mudansa tan. Tantu Governu no Pelican Paradise halo ona konfirmasaun eskrita katak Akordu Investimentu Espesiál ho Anexu hetan ona aseitasaun hosi parte rua, nune’e prontu hodi ba asina bazea ba konfirmasaun hosi parte rua ne’e mak publika Rezolusaun 133/2021,” nia dehan.

Nune’e, iha loron hanesan (17/12), Ministru Prezidénsia Konsellu Ministru, Fidelis Manuel Leite Magalhães no Ministru Koordenadór Joaquim Amaral fó garantia ba Pelican Paradise, katak ida ne’e problema internál Governu ne’ebé bele rezolve, maibé labele rezolve iha loron ne’e kedas tanba Primeiru-Ministru (PM), Taur Matan Ruak, nia kondisaun saúde ladi’ak.

“Ministru Fidelis ho Ministru Joaquim fó garante katak asuntu ne’e sei rezolvidu iha 22 dezembru 2021 no sei laiha alterasaun ka mudansa adisionál ba rezolusaun 133/2021 ne’ebé publika ona. Pelican Paradise dezepsionada ho rezultadu ida-ne’e, depois de konkorda ona mudansa sira-ne’ebé Governu husu hodi husu de’it alterasaun adisionál ne’ebé la diskute iha momentu asina akordu,” nia afirma.

Maske nune’e, Pelican Paradise simu garante ne’ebé fó hosi Ministru Fidelis no Joaquim Amaral hodi nafatin iha komprimisu ba projetu ne’ebé dezenvolve ona ho entusiasmu husi Pelican Paradise.

Entretantu, akordu investimentu espesiál ne’e atubele fasilita halo kontratu ho kompañia seluk hodi hamutuk halo investimentu faze dahuluk ba konstrusaun otél, apartamentu no rezidénsia hamutuk unidade 287 ho estandarte fitun-lima, ho kustu obra hamutuk millaun $100.

Àrea dezenvolvimentu turistiku sei harii iha rai ektare 558, iha zona entre Tasi-Tolu no Tibar, ne’ebé sei inklui unidade otelária, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Dezenvolvimentu ne’e sei permite kriasaun kampu traballu ba ema 1.500 iha faze konstrusaun no 1.300 kampu traballu permanente hafoin konstrusaun no reflorestasaun projetu.

Notísia relevante Governu reajusta dokumentu legál molok selebra akordu investimentu Pelican Paradise

Jornalista : Antónia Gusmão

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here