Prezidente UPJTL eleitu, Horacio Babo. Imajen/Espesiál.

DILI, 18 dezembru 2021 (TATOLI)—União da Profissão de Jornalista de Timor-Leste (UPJTL) realiza kongresu dahulukmne’ebe hala’o iha salaun Ministériu Solidariedade Sosiál no Inkluzaun (MSSI) Caicoli iha 17-18 dezembru 2021 ne’e, Horacio babo eleitu sai Prezidente UPJTL períodu 2021 to’o 2025.

Iha votasaun ne’ebé partsipia hosi kongresista hamutuk ema 104 ne’e hamosu pakote rua, kompostu hosi pakote A Prezidente Horacio Babo no pakote B Prezidente Lucas Monteiro, ho rezultadu votasaun hatudu Horacio Babo sai vensedór ho votu 57 no Lucas da Costa hela ho votu sia (9) no invalidu (1).

Prezidente Eleitu UPJTL, Horacio Babo, hateten durante nia mandatu sei esforsu makaas hodi fo formasaun no advokasia ba jornalista sira no hasa’e jornalista sira-nia konsiénsia.

“Iha ha’u-nia mandatu ba períodu dahuluk ne’e, ha’u sei esforsu makaas hodi fó formasaun no advokasia ba jornalista sira, atu hodi hasa’e jornalista sira-nia konsiénsia,” Prezidente eleitu ne’e hateten iha ninia diskursu, sábadu ne’e.

Prezidente Conselho de Imprensa (CI), Virgilio da Silva Guterres “Lamukan”, apresia ba ezisténsia UPJTL ninian no husu atu hasa’e produtu kualidade jornalista sira-nian liuhosi kapasitasaun hodi fasilita jornalista sira hodi tuir formasaun.

Nia enkoraja estrutura foun atu hahú halo prosesu administrativa sira hanesan rejistu notariadu, atu nune’e ikus mai hetan edifisiu legál no bele asesu ba atividade sira liu-liu kona-ba formasaun ba jornalista sira.

Iha tinan 2022 no 2023 hanesan tinan polítika ne’ebé jornalista sira sei hasoru dezafiu ne’ebé mak boot iha terrenu bainhira atu halo kobertura másima ba kampaña eleitorál ba eleisaun prezidensiál 2022 no eleisaun parlamentár 2023.

“Husu ba mídia estatál hanesan RTL, E.P no TATOLI, I.P tenke iha liña oin atu fó informasaun ne’ebe balansu ba públiku, atu nune’e públiku bele hetan informasaun ne’ebé di’ak,” Prezidente Conselho de Imprensa ne’e hateten.

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, promete atu servisu hamutuk ho organizasaun jornalista hotu-hotu ne’ebé eziste iha Timor-Leste hanesan Timor-Leste Press Union (TLPU), Asosisaun Jornalista Timor Lorosa’e (AJTL) inklui UPJTL ne’ebé mak foin eziste.

Governante ne’e nafatin enkoraja UPJTL atu esforsu makaas, nune’e bele rejistu hodi hetan legalidade hanesan organizasaun ida nune’e bele hetan apoiu hosi Governu liu-liu órgaun ne’ebé tutela iha Komunikasaun Sosiál.

UPJTL eziste bezea ba konstituisaun

Iha parte seluk, Prezidente Komisaun Instaladora Kongresu Dahuluk ba União da Profissão de Jornalista de Timor-Leste (UPJTL), Xisto Freitas da Peidade, hateten organizasaun UPJTL mosu tanba bazea ba konstituisaun RDTL artigu 43 ne’ebé haktuir kona-ba liberdade asosiasaun nian.

“Asosiasaun ida-ne’e mosu la’ós atu kompete fali ho instituisaun sira seluk ne’ebé antes ne’e iha ona, maibé mai hanesan parseiru ida oinsá atu kompleta malu hodi luta kontra dez-igualidade ne’ebé mak fonte empregadór sira halo hasoru jornalista iha ninia knaar,” Xisto Freitas da Piedade hateten ba jornalista sira iha salaun MSSI, Caicoli, Dili, sesta ne’e.

UPJTL ho ninia misaun mak hakarak jornalista sira-ne’ebé mak halo kobertura iha terrenu bele dignu, tanba dalabarak jornalista hala’o kobertura iha terrenu sempre sai alvu ba problema entre fonte no empregadór sira.

“Buat hirak ne’e hotu mak asosiasaun ne’e mosu para kompleta asosiasaun sira seluk ne’ebé iha ona, nune’e sai hanesan advokasia ida di’ak ba kolega jornalista sira ho dignu. Tuir lei sira ne’ebé mak hateten kona-ba direitu no dever traballadór no ema profisionál sira-nia servisu,” nia hateten.

UPJTL nia vizaun mak oinsá bele akompaña ba advokasia ida-ne’ebé di’ak ba jornalista sira-ne’ebé loro-loron hala’o kobrtura iha terrenu hodi divulga informasaun ba públiku.

UPJTL mosu atu kompleta no reforsa tan asosiasaun jornalista seluk ne’ebé eziste ona atu bele kontribui di’ak liután, no bele hamatan ba jornalista sira iha terrenu ho dignu.

“Papél ida asosisaun nian ne’e, la’ós halo advokasia de’it maibé eleva mós kapasidade jornalista sira-nian liuhosi formasaun tékniku no tenke halo rutina kada trimestral ka semenál, para kadi beibeik sira-nia koñesimentu iha sira-nia área,” nia esplika.

Jornalista  : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here