Oradór no Diplomata timor-oan iha Jenebra, Francisco Dionísio Fernandes “Mau-Kura” (klaran), hasai retratu hamutuk ho partisipante semináriu ne’ebé fakuldade FISIP UNTL realiza, sábadu (18/12) ne’e. Imajen/Espesiál.

DILI, 18 dezembru 2021 (TATOLI)–Oradór no Diplomata timor-oan iha Jenebra, Francisco Dionísio Fernandes “Mau-Kura” konsidera dezenvolvimentu setór edukasaun nunka iha rohan ne’e duni governu ne’ebe de’it kaer ukun tenke kontinua investe iha setór edukasaun.

Nia hateten, investimentu iha área sosiál hanesan edukasaun no saúde ne’e laiha nia rohan, tanba Governu ida troka no seluk mai fali kontinua investe nafatin iha setór edukasaun ne’ebé sei prodús rekursu umanu sira ho kualidade hodi bele dezenvolve no konstrui Estadu Timor-Leste.

“Ha’u hanoin Governu ne’ebé de’it mak kaer ukun sei la sees hosi planu dezenvolvimentu estratéjiku ne’ebé mak kria ona. Governu ne’ebé de’it mak kaer ukun sei kontinua planu ne’e. Tanba ne’e mak ita-nia VIII Governu konstitusionál kontinua investe fundu hodi kontinua dezenvolve setór edukasaun,” Maukura hateten ba Agência Tatoli hafoin ramaya semináriu ne’ebé UNTL realiza ho tema |Espiritu Patriota Mak Ha’u-nia Bukae ba Dezenvolvimentu Nasionál Timor-Leste”, iha kampus UNTL Sentrál, Caicoli, dili, sábadu ne’e.

Timor-Leste daudaun ne’e tama ona iha VIII Governu dezde Timor-Leste hetan ukun an iha 1999 mai too ohin loron ne’e, hahú hosi ahu-kdesan ne’ebé iha sasán balun tenke konsidera hetan ona progresu, tanba ne’e agora timor-oan lalika hatudu liman ba malu.

“Ba oin ita hakarak halo buat ida di’ak liután. Dezenvolvimentu iha kapitál umanu ne’ebé definidu iha planu dezenvolvimentu estratéjiku Governu atuál kontinua investe harii infraestrutura kontinua investe iha kualidade profesór, kuríkulu mós kontinua dezenvolve hela,” nia derhan.

Ne’ebé responsabilidade Governu nian maka kontinua halo reflesaun ba planu dezenvolvimentu estratéjiku ne’ebé dura ba tinan 20 ba leten. Bainhira seidauk atinje bele kontinua halo revizaun to’o atinje meta ne’ebé definidu.

Jornalista : Tomé Amado

Editór       : Cancio Ximenes       

PUBLISIDADEiklan

HAKEREK NO HATÁN

Please enter your comment!
Please enter your name here