Universidade Nasionál Timor-Lorosa’e (UNTL). Imajen TATOLI/Francisco Sony

DILI, 17 dezembru 2021 (TATOLI)–Dosente hosi Institutu Profisionál de Canossa (IPDC), Mónica de Araújo no Estudante Universidade Nasionál Timor-Lorosa’e (UNTL), Costantino de Jesus, sai manan-na’in iha kompetisaun hakerek sientífiku no diskursu públiku ho lian portugés.

“Atu sai ema hakerek na’in ida la fásil, tanba presiza iha planu, tenke iha testu, no revizaun.  Prosesu tolu ne’e iha ligasaun bainhira atu hakerek testu ida. Enkuantu atu hakerek testu ida tenke iha uluk input atubele hamosu mós output,” Mónica de Araújo, hateten hafoin simu sertifikadu apresiasaun no prémiu hosi Governu iha salaun Ian Martin Instituto Nacional de Formação de Docentes e Profissionais da Educação de Timor-Leste (INFORDEPE), Balide, sesta ne’e.

Notísia relevante: Profesór tolu sai vensedór iha kompetisaun diskursu lian portugés

Dosente ne’e elabora testu ho títulu ‘A vida de Bi-Soi’ ne’ebé haree ba labarik ida-ne’ebé valente no mimoza, nune’e tau importante rona nu’udar kompeténsia ida hodi dezenvolve fali kompeténsia seluk hanesan lee, hakerek no koa’lia. Tanba títulu ne’e fó personajen furak atubele dezenvolve hodi halo aprezentasaun.

Tuir Mónica, nu’udar partisipante iha eventu ne’e, nia la sente hakfodak halo aprezentasaun tanba iha ona esperiénsia hakerek testu portugés, ne’ebé nia bele finaliza elaborasaun testu iha loron-rua nia-laran.

“Ha’u sente baibain hela atu elabora testu ida, tanba loron-loron ha’u hakerek hela de’it. Tanba ne’e hanesan hahán ida ba ha’u,” nia akresenta.

Dosente lian portugés ne’e nota katak, durante ne’e timor-oan barak mak hasoru dezafiu atu hakerek testu sientífiku ida tanba Timór laiha kultura lee, entaun difikulta atu elabora testu ida.

“Bainhira timor-oan hotu maka tau importánsia ba lee, ha’u fiar katak ba oin Timór mós bele,” nia enkoraja.

Iha biban hanesan, Estudante hosi UNTL, Costantino de Jesus, hateten, tema ne’ebé nia kria iha diskursu públiku ne’e uza plataforma dijitál iha ámbitu COVID-19.

“Tema ne’e konsidera atuál no adekuadu ba situasaun Timor-Leste nian iha ohin loron, liga direita ho atividade Ensinu Superiór iha prosesu aprendizajen nia laran,” nia dehan.

Costantino nu’udar mana-na’in hetan prémiu osan ho valor $600 inklui sertifikadu apresiasaun hosi Governu tanba hanesan jerasaun foun ne’ebé iha esforsu prepara-an ba futuru.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here