Prezidente Agência TATOLI,I.P, Manuel Pinto. Imajen TATOLI/Egas Cristóvão.

DILI, 17 dezembru 2021 (TATOLI)—Atu taka anu fiskál 2021, Konsellu Diretivu Agência Noticiosa de Timor Leste, Institutu Públiku (TATOLI I.P) ho funsionáriu tomak hala’o enkontru anuál hodi avalia progresu servisu ne’ebé hala’o tiha ona durante tinan ida-nia laran.

Enkontru anuál ho tema “Refleta Ba Ezekusaun Planu no Programa 2021 sai Preferénsia hodi Garante Kualidade ba Ezekusaun Planu no Programa” ne’ebé aprezenta oradór hosi Asesor/a Unidade Planeamentu Monitoriazasaun Avaliasaun (UPMA), Antonio Soares no Alzira Reis, no Diretór Formasaun Institutu Nasionál Administrasaun Públika (INAP), José de Araújo Chang, ne’ebé aprezenta kona-ba “Lideransa”.

Prezidente Konsellu Diretivu Agência TATOLI, I.P, Manuel Pinto, hateten atividade avaliasaun refere hanesan kultura servisu ida-ne’ebé TATOLI, I.P opta hahú hosi ninia ezisténsia nu’udar institupu públiku iha tinan 2019 to’o agora.

“Iha aminia servisu kada trimestre, halo avaliasaun no tinan ida tomak mós ami halo avaliasaun ho objetivu atu ita bele sukat itania andamentu servisu sira-ne’ebé ita halo hakarak atu hatene to’o iha ne’ebé ona, ita halo ne’e halo loloos ona ka lae. Ida-ne’e mak durante ne’e ita halo,” Prezidente Konsellu Diretivu Agência TATOLI, I.P ne’e hateten iha ãmbitu avaliasaun anuál, iha Salaun Centro Nacionál Chega! (CNC), Antigu Komarka, Balide.

Hosi avaliasaun servisu ida-ne’e, nia dehan, mak TATOLI, I.P bele hatene katak progresu servisu ne’e to’o ona iha ne’ebé no sei bele kontinua tan ba iha ida-ne’ebé no presiza hadi’a mak ida-ne’ebé.  

Asesora Planeamentu no Monitorizasaun iha Unidade Planeamentu, Monitorizasaun no Avaliasaun (UPMA), Alzira Reis hateten, atividade enkontru anuál ne’e di’ak tebes tanba ida ne’e sai hanesan ezemplu ida-ne’ebé di’ak ba instituisaun sira seluk, atu bele haree filafali saida mak sira halo ona durante tinan ida-nia laran.

Assesora unidade planeamento monitoriazasaun Avaliasaun (UPMA), Alzira Reis. Imajen TATOLI/Egas Cristóvão

“Aminia prezensa ohin loron ne’e atu fó hanoin de’it katak iha buat barak ne’ebé TATOLI, I.P  halo ona tuir planu ne’ebé iha. Maibé iha buat balun hanesan tékniku nian presiza mellora di’ak liután iha futuru, hodi nune’e fasil ba TATOLI, I.P nia ema sira atu bele akapta sira ninia rezultadu mak ida ne’ebé no oinsá sira atu define sirania rezultadu, atu nune’e iha tinan tolu oin mai bele hatene katak buat ne’ebé halo, nia impaktu ba benefisiáriu ne’e mak saida,” nia hateten.

Iha fatin hanesan, Diretór Formasaun Institutu Nasionál Administrasaun Públika (INAP), José de Araújo Chang hateten, TATOLI, I.P sai Institutu Públiku foin hamriik iha tinan 2021, nune’e ho sasukat ne’e INAP seidauk bele halo sasukat katak Tatoli di’ak ona ka seidauk maibé TATOLI, I.P iha ona rekursu ne’ebé sufisiente.

“Agora ha’u haree katak TATOLI, I.P iha ona rekursu ne’ebé sufisiente bele halo kobertura ba to’o iha munisípiu sira, tanba bainhira ha’u ba fó formasaun iha Baucau, ha’u haree TATOLI, I.P eziste. Ida-ne’e hatudu katak TATOLI, I.P hahú ona ho buat di’ak ida entermu kualidade di’ak ona,” nia dehan.

Importante tebes ba TATOLI, I.P komesa tau atensaun ba iha nia rekursu umanu, entermu kualidade no kuantidade, nune’e presiza fó oportunidade ba jornalista sira tuir formasaun iha área jornalizmu nomós área administrasaun, língua no área sira seluk.

Ho formasaun ne’e, nia hateten, TATOLI, I.P bele mellora liután mídia Estadu ne’e nune’e públiku sira bele hetan benefisiu hosi informasaun ne’ebé publika loro-loron.

Daudaun ne’e funsionáriu Agência TATOLI, I.P hosi redasaun no administrasaun hamutuk 73, kompostu hosi Konsellu Diretivu na’in-tolu, fiskál úniku ida, redasaun 44 no administrasaun 25.

Iha loron 07 marsu 2017, liuhosi reuniaun Konsellu Ministru aprova kriasaun Agência TATOLI, I.P nu’udar kontinuasaun hosi kriasaun portál notísia ida http://tatoli.tl, ne’ebé estabelese ho embriaun hanaran ANTIL, hafoin muda naran ba TATOLI.

Objetivu prinsipál hosi Agência TATOLI, I.P mak sai fonte informasaun ofisiál, ho produsaun informasaun ba públiku ho eskala nasionál, rejionál no internasionál, ho karakter multikanál, multimédia, multiplataforma no multitarefa.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here