Prezidente Konsellu Ezekutivu INCT, José Cornélio Guterres. Imajen TATOLI/Francisco Sony

DILI, 17 dezembru 2021 (TATOLI)–Institutu Nasionál Siénsia Teknolojia (INCT) lansa ona regulamentu étika ba peskiza atu kontrola atividade peskizadór sira bainhira rekolla dadus ruma kona-ba ema-nian direitu iha terrenu.

“Ita sei forma komisaun étika ida kompostu hosi ema na’in-10 atu halo serbisu hodi haree, kontrola no atualiza obra sira ne’ebé maka peskizadór sira prodús. Kuandu obra peskiza sira ne’e iha tendénsia plajiarizmu mak sei la hetan konsiderasaun. Étika peskiza ne’e hanesan giaun ida atu regula atividade saida de’it mak peskizadór sira halo, liu-liu kona-ba ema no animál sira,” Prezidente Konsellu Ezekutivu INCT, José Cornelio Guterres, informa iha salaun Ian Martin Instituto Nacional de Formação de Docentes e Profissionais da Educação de Timor-Leste (INFORDEPE), Balide, sesta ne’e.

Notísia relevante: Peskizadór na’in-16 aprezenta rezultadu preliminár ba INCT kona-ba sientífiku-teknolójiku

Tuir José Cornelio, intensaun produsaun étika ba peskiza ne’e atu ezije peskizadór sira tenke respeita ema seluk ninia obra.

“Labele halo plajiarizmu (kopia ema seluk nia obra), labele halo falsifikasaun dadus (inventa dadus laiha faktu), hasai ema nia foto laiha lisensa, no labele publika ema-nia naran iha relatóriu ruma kuandu ema na’in la aseita, atu nune’e labele hamosu kazu iha peskiza laran,” nia akresenta.

Tanba ne’e, étika peskiza ne’e sei vale ba ema hotu no INCT sei halo sosializasaun ba instituisaun públika no privada sira atu hatene, nune’e bele apár ho informasaun sira.

Atividade peskiza ne’e ninia intensaun maka labele hakanek ema seluk ninia sentimentu.

Produsaun étika peskiza ne’e realiza ho kooperasaun serbisu entre INCT no United Nations Educational, Scientific and Cultural Organization (UNESCO) Jakarta, ne’ebé entrega ona ba INCT iha loron 15 dezembru liubá no hetan ona apresiasaun hosi Konsellu Sientífiku INCT no ohin konsege halo ona lansamentu.

Jornalista : Tomé Amado   

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here