Espoza Prezidente Repúblika, Cidália Lopes Nobre Mouzinho, halo vizita ba orfanatu iha Santa Terezinha Maubara, kinta (16/12) Imajen/Espesiál

DILI, 17 dezembru 2021 (TATOLI)–Espoza Prezidente Repúblika (PR), Cidália Lopes Nobre Mouzinho, lori apoiu solidaridade ba Orfonatu Santa Terezhina do Menino Jesus, iha postu administrativu Maubara, munisípiu Liquiçá.

Iha vizita ne’e, Espoza PR apresia ho inisiativa Madre Carmelita sira ne’ebé loke ona fatin orfonatu hodi halibur oan-kiak no labarik sira.

“Hau agradese ba Madre sira tanba loke fatin ne’e hodi simu ita-nia alin no oan sira ne’ebé lakon inan-aman, família la tau matan no sira ne’ebé mak inan-aman bele iha maibé laiha kbiit atu haree alin oan sira ne’e, kongregasaun simu ona alin oan-sira, halibur no eduka sira liuhosi fó apoiu ba isin no klamar,” Cidália Lopes Nobre Mouzinho hateten liuhosi nota ne’ebé Agência TATOLI asesu, sesta ne’e.

Nia dehan, atividade ne’ebé Santa Terezhina do Menino Jesus halo la’ós halibur de’it estudante sira, maibé fó mós formasaun oin-oin ba isin no klamar hanesan misaun ne’ebé sagrada tebes.

“Nune’e ha’u mai nu’udar inan no sarani hodi halo asaun solidaridade, la’ós haree de’it ba sasán, maibé atu lori sentidu hanesan Maromak-oan ne’ebé buka halo di’ak,” nia akresenta.

Iha biban hanesan, Diretora Orfonatu Santa Terezhina do Menino Jesus, Madre Maria Mendes, agradese ba Espoza PR tanba ho fuan boot bele hakat ba sira-nia fatin.

“Ami agradese ba Espoza Prezidente Repúblika ne’ebé to’o duni ami-nia fatin hodi vizita ita-nia estudante 23 ne’ebé hela iha koléjiu ne’e, prezensa ida-ne’e, ami la espera,” nia hateten.

Nia dehan, Santa Terezhina do Menino Jesus, akumula labarik sira ne’ebé eskola hahú hosi Pre-eskolár no Ensinu Báziku no bainhira to’o Sekundáriu mak sira kontinua iha Dili.

Apoiu nesesidade bázika ne’ebé Espoza PR lori ba orfonatu sira mak hanesan, foos, manu-tolun, mie, mina-sona no seluk tan.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here