IGE normaliza estrada iha Beduku hafoin inundasaun iha domingu (04/04). Imajen TATOLI/António Gonçalves

DILI, 17 dezembru 2021 (TATOLI)-Prezidente Konsellu Administrasaun Institutu Jestaun Ekipamentu, Institutu Públiku (IGE, I.P, sigla portugés), Ermenegilda da Costa Laurentina, husu ba entidade relevante Governu hodi tau-matan ba empreza privada sira fera-rai iha foho lolon, presiza envolve IGE, I.P.

“Ami husu ba Sekretaria Estadu Meiu Ambiente (SEA) bainhira empreza privada ida halo serbisu fera rai iha foho leten, presiza envolve ami hodi haree situasaun, tanba fukun akontese inundasaun ita haree ona, hakarak ka lakohi bainhira kee iha foho leten, tempu udan foer sira tenke tuun mai taka komunidade nia-uma,” Ermenegilda da Costa hateten foin lalais ne’e ba Agência TATOLI, iha Farol.

Nia dehan, inundasaun ne’ebé akontese iha loron 04 abríl liubá to’o agora, la’ós de’it bee sobu komunidade nia-uma, maibé foer sira hosi rai-leten tuun taka bee-dalan.

“Situasaun ne’e bainhira akontese ohin, ami bele suru sai sedimentasaun ne’ebé taka estrada, maibé udan kontinua la’o nafatin ho situasaun emerjénsia de’it, maibé atu rezolve di’ak ne’e susar, tanba IGE, I.P nia serbisu halo normalizasaun hanesan mota ne’e presiza bailoron,” nia akresenta.

Tuir nia, inundasaun foin lalais ne’e, IGE, I.P halo ona normalizasaun mota no estrada sira iha Dili laran, maibé agora tempu udan situasaun kontinua akontese filafali.

Notísia relevante: MOP orienta IGE identifika mota risku inundasaun hodi normaliza

“Agora ami mantein iha mota laran, durante ne’e ami rezolve mota Becusse, Ai-tahan Belar, Ailok-laran, Becusse, Maloa no Aitarak-laran, no iha tersa (14/11) bainhira akontese udan boot, ha’u rasik tuun diretamente haree iha pontu iha Dili ne’ebé presiza apoiu emerjénsia hanesan iha Balide, Diresaun Nasionál Transporte Terestre nia oin, no Eskola SMA 04 setembru, Tasi-tolu, inklui  Metiaut iha Areia Branca  kuaze rai monu taka dalan, entaun ami fó apoiu emerjénsia,” nia konta tuir.

Maibé IGE, I.P presiza fera estrada iha parte Tasi-tolu, nune’e iha bee dalan, tanba daudaun ne’e laiha mak tempu udan akontese inundasaun.

“Fera estrada sei iha prosesu nia-laran, tanba sei presiza mós diresaun relevante ne’ebé estuda kona-ba tasi tanba tauk bee ba liu tasi fó impaktu fali ba animál tasi,” nia tenik.

IGE,I.P simu pedidu hamutuk 50 hosi territóriu tomak atu normaliza pontu estragu sira tanba udan boot ne’ebé akontese foin lalais ne’e, maibé institutu haree ba ida-ne’ebé presiza ajuda urjente liu, tanba tempu udan iha Dili loron ida pedidu bele tama 20 to’o 30.

“Pedidu sira maioria hosi Dili hanesan Maslidun, Tasitolu, Area Branca, Metiaut, Becora, Bedois, Camea, Taibessi, Balide, no Lahane, maibé iha Dili rasik ekipa IGE, I.P prontu lori mákina pezadu sira atu destaka ba fatin ne’ebé presiza ajuda emerjénsia, tanba fatin balun presiza mákina hanesan looder, eskavatór,  no seluk tan, tanba ne’e molok ita haruka mákina, ita sei halo observasaun iha terrenu,” Ermenegilda da Costa dehan.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here