Bebé ne’ebé moris mai kondisaun ho ulun-rua iha HNGV. Imajen/ espesiál

DILI,17 dezembru 2021 (TATOLI)— Bebé ida moris iha sala Pediatria Hospitál Nasionál Guidu Valadares (HNGV), iha kinta-feira (16/12), ho kondisaun isin lolon ida, maibé ulun mak kaduak, la konsege salva nia vida tanba bebé susar dada iis.

Médiku Espesialista Pediatria Hospitál Nasionál Guido Valadares (HNGV), Milena Lay do Santos, esplika katak bebé ne’e moris, horiseik (16/12), iha HNGV liuhosi operasaun sesar (Caesar), hafoin bebé ida moris mai ho kondisaun isin lolon ida de’it, maibé ulun kaduak no médiku sira konsege salva tanba susar dada iis.

“Ita bele dehan ulun-rua ka ulun kaduak,  isin-hamutuk ida ka orgaun sira iha laran mos ida de’it ne’e grave loos tanba dada iis susar.  Tanba ne’e, ita iha planu atu prepara ekipamentu halo operasaun no iha posibilidade transfere ba rai-liur, maibé ohin dader ita la konsege salva nia moris tanba dada iis susar,’’ Médiku Espesialista Pediatria HNGV, hateten ba jornalista sira iha HNGV-Bidau, sesta ne’e.

Iha biban hanesan, Médiku Jerál HNGV, José Cabral, hateten, bainhira bebé moris mai, Doutór Espesialista-sira leno no nia rezultadu katak bebé iha fuan rua no ulun rua, nune’e, ohin dader atu leno tan hodi haree nia aten, maibé la konsege bebé hakotu iis ona.

“Ita nia espesialista sira no informa mai ha’u katak bebé ne’e iha fuan rua no ulun rua, entaun sira planu ona ohin dader mak atu leno atu ita haree nia orgaun sira seluk ne’e iha, maibé ikus labele salva nia moris, maski médiku sira esforsu makas,” nia afirma.

Entertatu, Aman hosi bebé, Agapito José, infroma, durante nia bebé iha kabun laran, nia feen kontinua tuir imunizasaun iha postu Remexio, Aileu no parteira sira leno dehan bebé ne’e kaduak.

“Sira leno dehan bebé ulun rua entaun sira hateten mai ami katak bebé kaduak,   maibé nia  isin lolon sira la hetan. Nune’e horiseik hala’o operasaun iha HNGV no ha’u haree katak bebé ulun rua isin ida de’it, no médiku sira planu atu halo operasaun, maibé Maromak bolu hikas filafali,’’ Aman hosi bebé ne’e afirma ho laran triste.

Jornalista : Felicidade Ximenes

Editór      : Florencio Miranda Ximemes

PUBLISIDADEiklan

HAKEREK NO HATÁN

Please enter your comment!
Please enter your name here