Ekipa mediku sira prepara hela vasina pfizer hodi vasina ba estudantes eskola Sao Pedro Komoro, tersa 16/11/2021.Imajen TATOLI/Antonio Goncalves

DILI, 16 dezembru 2021 (TATOLI)— Tuir dadus hosi Ministériu Saúde kona-ba progresu imunizasaun COVID-19 ba sidadaun ho idade 12 no menus hosi 18 ne’ebé simu ona vasina Pfizer doze dahuluk atinje ona 19,3%.

“Populasaun ho idade 12 no menus hosi 18 ne’ebé simu ona vasina Pfizer doze dahuluk 19,3% ne’ebé ekivalente ho ema 35,142. Enkuantu  simu ona vasina Pfizer doze kompletu ho 15,4%  ho ema 27,998,” refere nota ne’ebé Agência TATOLI asesu, kinta ne’e.

Estudante ho idade 12 to’o 17 iha munisípiu Dili no munisípiu seluk simu ona vasina Pfizer hodi proteje ho efikásia 95% hosi infesaun sintomátika SARS-CoV-2.

Governu liuhosi Ministériu Saúde lansa ona vasina Pfizer doze dahuluk, hahú 27 outubru to’o novembru 19, hafoin 20 novembru tama ba doze daruak. Define doze daruak hosi vasina ne’e sei administra ho intervalu loron 21.

Tuir planu vasinasaun ne’e sei realiza iha eskola sira no ba alunu foin-sa’e 50.000-sira hosi 60 to’o 110 ano, hosi munisípiu pre selesionadu ne’ebé maka sei simu vasina ba dahuluk.

Timor-Leste rejista totál kazu konfirmadu pozitivu COVID-19 ba labarik tinan 18 mai kraik na’in-3.661 (19%) no óbitu na’in-13 (11%).

Entretantu, totál vasina AstraZeneca no SINOVAC ne’ebé fó ona ba sidadaun ho idade 18 ba leten iha territóriu nasionál hamutuk 1,109,724.

Hosi totál ne’e, populasaun elijível tinan 18 ba leten, ne’ebé simu ona vasina iha loron 9 novembru, tuir sistema informasaun Saúde iha Ministériu Saúde, hanesan kumulativu 1ª doze iha Dili (87,1%) no kumulativu 2ª doze iha Dili (78,7%).

Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 82,6% no simu ona doze daruak 64,5%.

Sala Situasaun, Sentru Integradu Jestaun Krize (CIGC, sigla Portugés) relata, ohin (16/12), kazu detetadu foun laiha, rekuperadu laiha, no kazu ativu haat.

Nune’e, hahú 21 marsu 2020 to’o 16 dezembru 2021 iha kumulativu kazu konfirmadu 19.804 no óbitu 122.

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here