Debate no votasaun Orsamentu Jeral Estadu 2022 iha sala plenária Parlamentu Naasionál, kuarta (15/12/2021). Imajen TATOLI/António Gonçalves

DILI,16 dezembru 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, husu Governu reforsa kapasidade jestaun interna no transparánsia ba entidade sira atu ezekuta Orsamentu Jerál Estadu (OJE) 2022 ho montante billaun $2.

Notísia Relevante: PN aprova proposta OJE 2022 billaun $2 iha finál globál

Prezidente Parlamentu Nasionál ne’e hato’o parabens ba oitavu Governu konstituisionál lideradu Primeiru-Ministru, Taur Matan Ruak, akompaña membru Governu no deputadu sira ho mós parte relevante sira kumpre ona dever konstitusionál ba povu no Estadu Timor-Leste tanba OJE 2022 aprova ona iha finál Globál ho montante billaun $2 atu bele asegura governasaun no dinamiza TL nia dezenvolvimentu.

“Ita hala’o implementasaun OJE bazeia ba programa tinan daruak ne’ebe presiza reforsa tan ho kapasidade jestaun interna no transparánsia ho responsabilidade,” Deputadu Aniceto Longuinhos Guterres Lopes hateten hafoin aprova proposta lei OJE 2022 iha finál globál, iha plenária Parlamentu Nasionál, kinta ne’e.

Konsiente preokupasaun ho sustentabilidade fundu pretolíferu tanba fonte ekonómiku seguru seluk seidauk kobre reseita naun petrolíferu no mós asegura estabilidade ekonomia iha Timor-Leste nian seidauk dezenvolve didi’ak.

Nia hato’o observasaun ikus iha debate OJE 2022 koloka situsaun lubuk ne’ebé presiza parte hotu tau atensaun sériu, tanba iha tinan rua hirak ne’e ho restrisaun ne’ebé Estadu impoin ho situasaun COVID-19 kauza saúde públika ne’ebé no agora mosu tan variante foun Omicron ne’ebé agora espalla ona iha mundu.

Aleinde hasoru situasaun alterasaun klimátika no dezastre naturál sai preokupasaun sériu liután iha ámbitu dezenvolvimentu nasionál, nune’e OJE 2022 prevee ona prioridade sira hodi rekupera ekonómia no luta kontra COVID-19.

Vise Prezidente Bankada FRETILIN, Deputadu Antonino Bianco, hateten liu tiha diskusaun ida produtivu ho krítiku iha durante loron neen ho votasaun no aprovasaun, ho maioria kualifikada ba finál globál ba OJE 2022 ho reseita globál konsolidada $2.106.860.231 no ba admistrasaun  sentrál ho montante $1,859,477.947.

Bankada Fretilin elojia atuasaun otivadu Governu Konstitusionál ho baze ba iha prinsípiu transparensia, respeitu ba lei, responsabilidade no partisipasaun, nu’udar indikadór fundamentál hosi boa-governasaun, hodi fó importánsia liu ba kualidade no rezultadu duké haree ba ezekusaun orsamentu.

“Orsamentu Jerál Estadu ba tinan 2022 la’ós atu rezolve buat hotu-hotu, maibé bele rezolve buat balun tuir nesesidade no kapasidade ne’ebé iha aumentu alokasaun orsamentál ba infraestrutura bázika, infraestrutura sosiál no infraestrutura ekonómika, nebé reflete ba polítika ema mak sai sentru ba dezenvolvimentu,” nia hateten.

Bancada Fretilin husu Primeiru-Ministru, Taur Matan Ruak, no membru Governu atu konsolida no hadia di’ak liután liña koordenasaun inter-ministeriál no entre instituísaun sira, hodi bele implementa OJE 2022 ho efisiénsia no efikásia, hadi’a kualidade no prestasaun servisu, hadi’a kualidade projetu, tuir prinsípiu boa-governasaun.

Bankada CNRT, reprezenta Deputada Patrocinio Fernandes hato’o observasaun lala’ok debate OJE 2022 iha kontestu kapasidade meza parlamentu hasoru deputadu CNRT.

Bankada CNRT lamenta maneira jere meza plenária la haree proporsionalidade hodi fó hanoin krítika ba proposta OJE laiha ona respeitu direitu bankada simu informasaun kona-ba asuntu interrese nasionál hosi artigu 70 konstituisaun RDTL.

Nia kestiona, Governu laiha kbiit tanba aprova ona tetu OJE iha Konsellu Ministru maibé mai iha Parlamentu Nasionál bankada Governu halo proposta hodi hasa’e tetu OJE 2022 mezmu Governu laiha esplikasaun klaru.

“Mezmu Primeiru-Ministru mai afirma orsamentu pur programa maibé realidade bankada Governu hato’o proposta sobu tiha orsamentu, nune’e la prudente kontra nia polítika atu evita foti osan barak liu labele foti liu rendimentu sustentavel,” nia kestiona.

Bankada CNRT preokupa kapasidade reál OJE 2021 to’o iha fin ezekusaun 59% maibé husu osan boot.

“Ho razaun sira-ne’e hotu mak bankada CNRT vota kontra OJE 2022,” nia dehan.

Reprezentante Bankada PD, Deputadu Mariano Assanami Sabino, afirma PD fó apoiu ba orsamentu tanba ho prinsípiu katak orsamentu mak raan ba Estadu no povu presiza.

PD laiha kompromisu ho Governu ne’ebé de’it mak ukun mezmu sai opozisaun maibé kompromisu ba povu tanba ho situsaun COVID-19 no impase polítika liubá oinsá atu rekupera hikas ekonómia, nune’e orsamentu ne’e presiza tebes ne’ebé prevee ona atu halo uma ba povu, hasa’e subídiu lidér komunitáriu no idozu aumenta no hatán mós ba nesesidade bázika sira seluk hanesan bee-0moos, eletrisidade tanba ne’e husu ezekuta orsamentu ho dixiplina.

Bankada PLP, Francisco de Vasconcelos, hateten ohin termina debate liuhosi aprovasaun finál global ho OJE 2022 montante boot lori bankada PLP nia naran hakarak apresia no kontgratula ba esforsu tomak hosi oitavu Governu Konstituisionál no Parlamentu Nasionál hodi toma desizaun importante ida-ne’e ba vida Estadu nian.

“Ita hakarak iha 2022 hanesan tinan rezisténsia no rezilénsia ba povu, tanba ne’e mak iha 2020 Governu avansa kedas ho estabilizasaun ekonómika ne’ebé ambisiozu define pakote estimula ekonómia kompostu hosi medida konkretu hamutuk 11 ho hanoin atu hamenus efeitu oioin ne’ebé mosu iha ita-nia rain,” nia hateten.

Deputadu KHUNTO, Luis Roberto, hateten KHUNTO mai ho prinsípiu katak ‘mai tane ó rai no o lisan’ nune’e hakarak husu no iha esperansa Primeiru Ministru no membru Governu sira atu ezekuta osan ho montante ne’ebé boot hodi dezenvolve nasaun.

“Osan mak halo dezenvolvimentu no rekupera ekonómia. Husu ba entidade soberania haat atu kontrola orsamentu ne’ebé aprova ona iha implementasaun,” nia dehan.

Xefe Bankada PUDD, António de Sá Benevides, hateten PUDD vota a-favór ba orsamentu ne’e tanba povu presiza maibé orsamentu ida-ne’e la hanesan anteriór tanba  deputadu sira barak hato’o proposta hodi aumenta osan boot no Governu mak implementa presiza ho didi’ak.

Xefe Bankada Frente-Mudança, Isabel Freitas Ximenes, fó votu a-favór ba OJE 2022 nune’e bele benefisia povu kbiit laek hodi mellora setór saúde, edukasaun no problema bázika sira seluk ho kualidade.

Xefe Bankada UDT, Francisco David Xavier Carlos, observa katak durante diskusaun OJE 2022 mezmu iha tinan 20 ona, deputadu barak ne’ebé hanesan konsidera veteranu no polítiku katak realmente seidauk iha identidade koletivu ida ho podér Estadu, nune’e presiza buka solusaun hamutuk hodi lori dezenvolvimentu ba povu.

Notísia Relevante: Xefe Governu agradese PN aprova Proposta Lei OJE 2022

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here