Xefe suku Saburai, postu administrativu Maliana, munisípiu Bobonaro, Vicente dos Santos. Imajen Mídia PR.

BOBONARO, 15 dezembru 2021 (TATOLI) – Komunidade suku Saburai, postu administrativu Maliana, munisípiu Bobonaro, seidauk asesu eletrisidade.

Asuntu ne’e hato’o hosi Xefe suku Saburai, Viçente dos Santos, durante diálogu ho Prezidente Repúblika, De’it Guterres ‘Lú Olo, iha Jináziu Maliana, kuarta ne’e.

“Ami ne’e hela iha fronteira loron no kalan ami haree ema nasaun viziñu ahi lakan ami senti moe fali tanba tinan-tinan mk sunu lilin no solar painél hela de’it,” nia dehan.

Líder komunitária ne’e haktuir, projetu instalasaun liña eletrisidade antes ne’e Governu liuhosi Ministériu Obra Públika tau ona prioridade no publika iha Jornál Repúblika katak tama ona iha pakote instalasaun iha fulan-novembru tinan ne’e maibe realidade to’o agora seidauk.

“Ne’ebé ha’u rekomenda ba Governu hakarak ka lakohi, tempu badak tenkr realiza ona hodi ami bele senti ahi nia naroman iha tempu kalan hanesan ho suku seluk, nune’e estudante sira mós bele estuda iha kalan,” nia rekomenda.

Enkuantu Problema elertrisidade ne’e komunidade sira la asesu dezde okupasaun Indonezia mai to’o oras ne’e.

Totál populasaun iha suku Saburai hamutuk 2.972 ho xefe-família 711 komposta hosi aldeia Tas-Masak, Cosal no Mabil-Oa.

Hatán ba prekupasaun ne’e, Vise-Ministru Obra Públika (MOP), Nicolao Lino Freitas, rekoñese maske 90% populasaun Timor-Leste asesu ona enérjia eletrisidade maibé komunidade suku Saburai inklui suku balun iha postu administrativu neen iha munisípiu Bobonaro to’o agora seidauk asesu liña eletrisidade.

“Ha’u hanoin governu prevee hotu ona orsamentu, tinan  oin sei tama iha faze implementasaun projetu liña eletrisidade hodi kompleta planu governu nian katak populasaun hotu sei asesu eletrisidade,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here